Tukin zingkar khan Minister of State for AH & Vety Pu C. Ngunlianchunga chuan Lawngtlai AH &Vety Complex ah 2 Phase NLUP hnuaia Vawk vulh thlangtu chhungkaw 98 te hnenah Final Instalment Rs 10050 theuh a hlan.

Pu C. Ngunlianchunga chuan, Mizoram sawrkarin mipuiten hma an sawn lovang tih hlauvin an thawh thiam zawng eizawnna a thlan tira, chu an eizawnna thlanah chuan a bul tan sakin mamawh engkim a pe a, a vil zui bawk a ni. Chuti chung pawha kan la hlawhchham pui fo a nih ngai chuan a lungchhiat thlak hle ang. NLUP tanpuina dawngtute hian an tana sawrkar insen ral nasat zia hre chungin rah chhuah pui lul rawh se, tiin tanpuina dawngtute chu a fuih a ni.

Minister chuan Lawngtlai District vanneih bik zia sawiin District dang neih ve loh thil tam tak kan neia, hmasawnna tur sum pawh kan dawng tam bik a ni. He kan vanneihna ni te a kaltluan laia lei rem rapa kan intundin loh chuan kan tan khua a var lo ang tih a hlauhawm a ni, a ti a. Vawk vulh chu eizawnna tha tak, a hralhna lama harsatna tawk ngai meuh lo a nih avangin a tha hle a ni, a ti bawk.

NLUP semna inkhawm hi Dr Lalnunhlima Ralte, DVO Lawngtlaiin a kaihruai a, final Instalment an sem chu Vawk chaw leina tur a nih thu sawiin kan hma lawka Vawkte 4 theuh kan pek che u kha, duat taka enkawlin an tan chaw tha in lo ngaihtuah sak ang a, Department lam pawhin kan rawn enpui reng dawn che u a ni, tiin kalkhawmte a chah a ni.