NLUP hnuaia hmalakna hrang hrang tichangtlung lehzual tura Mizoram sorkar leh UNO te thawhhona kal mek zelah vawiin khan Lunglei Circuit House Conference Hall-ah District 3 - Lunglei, Lawngtlai leh Saiha-a AH& Vety. hnuaia thawkte tan Training of Trainers - Course Outline & Capacity Building Workshop on PRRS : Biosecurity, Monitoring & Surveillance’ neih a ni a. UNO hnuaia Food & Agriculture Organisation(FAO) bultuma huaihawt he Training of Trainers Workshop hi Chairman, ZENICS Pu Chalrosanga’n a hawng.

He Training of Trainers Workshop Jt.Director(SZ), AH&Vety Dr. Hmarkunga kaihhruaiah Khuallian Pu Chalrosanga Ralte chuan FAO mithiamte lo lawmin Lunglei leh chhimbial tan hetiang training hi a hmasa ber a nih avangin ni chhianchhiah tlak a nih thu a sawi a. Mizote chu pi leh pute hun lai atangin ranvulh thin hnam an nih thu sawiin vawiin thleng hian Mizo chhungkua tam takte chuan bawng, sial, vawk leh ar vulhin ei an zawng a, NLUP hnuaiah pawh ranvulh thlangtu beneficiary an ngah ber a ni, a ti a. Ran hrileng chi hrang hrang avangin ranvulhtuten harsatna an tawk reng a, state pum ang pawhin buaipui tham a nih laiin UNO hmalaknain vawiinah heng ran natna hri laka invendan leh enkawl dantur zirtir tura mithiam an lo kal chu a vanneihthlak hle a. Mizorama ranvulhtute leh mipuiten he training zar an zo ve ngei theihna turin training-a tel AH&Vety Department-a thawkten tihtakzetna thinlung pua mithiamte zirtirna ngaithla turin a chah.

UN FAO Team hotupa Dr.AB Negi pawhin thusawiin India ramah PRRS chu a bik takin hmarchhak bialah a hluar a, Mizoram atanga intan nia hriat a ni a, hemi chhan ber chu Mizoram chu ramdang nen ramri intawm a nih vang a ni, a ti a. FAO chuan PRRS laka invenna turin Champhai-ah PRRS natna kai vawk lo lutte dah hranna tur pindan ‘Quarantine Room’ sak te, FAO mithiam rualin Training of Trainers neihpui te leh ranvulhtute chu a hmunah kal chilhin zirtirna pein hma an la mek zel a. Tunkar September ni 24, 2015 (Nilaini) khan Aizawl-ah Trainers’ Training huaihawt tawhin vawiinah chhimbiala Vety staff-te tan training an buatsaih leh theih chu lawmawm a tih thu a sawi a. Tun tumah hian an hnuaia training chhuak ‘Trainers’ te chu a bika siam ‘smartphones’ te pawh an sem tur thu sawiin Dr. Negi chuan heng smartphones hmang hian Mizorama ranvulh kaihhnawih thilah FAO mithiamte nen an inbiakpawh theih reng turte leh ran natna veite awmna hmun an chhinchhiah theih tur thu te a sawi bawk.

FAO tirha vawk natna PRRS chungchanga zirtirna pe tura lo kal mithiam 5 te chu :

1). Dr. AB Negi, Subject Matter Specialist

2). Dr. Vikram Vashisht, Ex-FAO Concultant, Epidemiology

3). Dr P Dandapat, Pr Scientist, IVRI Regional Centre, Kolkata

4). Mohit Goel, IT Expert FAO 5). Jayan Krishnan, Administrative & Finance Officer, FAO te an ni a.

Anni tawiawm hian Directorate of AH&Vety, Aizawl atangin Dr.Jasper Rongura Sailo, Dy.Director(DI) leh Dr. Esther Lalzoliani, V.O.(DI) te an lo tel bawk a. Vawiin Workshop-ah hian DVO Lunglei Dr.Vanlalbuanga, DVO Saiha Dr.Padam Badur Chhetri leh DVO Lawngtlai Dr.Lalnunhlima Ralte bakah an hnuaia thawk staff te nen an zavaiin mi 45 lai an tel a ni. FAO mithiamten vawiina Workshop neihah hian PRRS leh ran natna hrang hrang chungchang hrilhfiahin, natna an kai tirha enkawl theih dante an zirtir a.

Kum 2013-2014 chhunga rawn inlar PRRS natna hi a bikin India-ah chuan Eastern / Northeastern state 5-ah a hluar a. A intan atanga vawiin ni thleng hian vawi 23 lai nasa takin a darhchhuak tawh a, tunhnaiah phei chuan Cambodia ramah pawh PRRS natna hi hmuhchhuah a ni leh tawh tih an sawi a, he natna atanga fihlim awmchhun chu Australia leh New Zealand te chauh an ni tih an tarlang a.

PRRS natna hi mihringah kaichhawn theih ni lo mahse PRSS vei tawh vawksa ei loh a him ber a, a chhan chu he natna hian mihring ti na thei natna hri dang a ti piang thei a. PRRS natna vei tan nia hriat vawk/vawk note te chu a rang theih ang berin khung hran nghal a, Vety lam mithiam hriattir vat tur a ni a. Vawk note lei tharte pawhin an vawk vulhsa te bulah an dah hmain kar 1 tal dah hrangin, natna hri kai awm anga a lang lo a nih chuan dahho chauh tur a ni tiin an hrilh. PRRS laka invenna emaw enkawl dam theihna damdawi hmuhchhuah a la nih loh avangin ranvulhtu ten ran vaccine pek tur ang angte chu tha tak leh a hun taka an pek chuan PRRS laka invenna tha tak a ni bawk tih an sawi.