India rama sipai officer ni tura inchherna Rashtriya Indian Millitary College (RIMC) Dehradun-a kumin July thlaa entrance-a Written exam-ah Mizo naupang pahnih an tling thar. RIMC entrance written-a tling tharte hi Zothanpuia s/o Lalfakzuala leh Lalmuanzuala Chawngthu s/o Zothansanga Chawngthu (L) Bungkawn Vengthar-te an ni.

RIMC-ah hian Mizo naupangte tun aia tam zawk an luh theih nan Chief Minister Pu Lal Thanhawla, School Education Minister Pu H.Rohluna leh Parliamentary Secretary Pu Joseph Lalhimpuia te chuan tan an la mek a, Mizoram-in seat tam zawk a neih theih nan kawng an dap mek a ni. Tun dinhmunah he school-ah hian Mizoram-in quota seat khat a nei a. State dangin an hnawhkhah theih loh changin pahnih luh theih chang a awm bawk. RIMC ah hian hriat theih chinah Mizo naupang 13-in an zir mek a, V. Lalremdika s/o V. Lalsangliana chuan he school atanga a zir chhuah hnuah NDA zawmin kum 3-na a zir mek a ni.

RIMC hi Doon Valley Dehradun-a awm a ni a, he zirna atanga chhuak te hi National Defence Academy ah te leh Indian Naval Academy ah te an lut leh a ni. Tun dinhmuna India Army-te, Navy leh Airforce-a officer rualte hi he school atanga zir chhuak te hi an ni. RIMC a lut turte hi India ram pum huapa buatsaih national level competitive exam kaltlanga thlan an ni a, entrance exam hi kum khatah vawi hnih January leh July ah te neih thin a ni. Written exam-a tlingte hian medical exam an paltlang leh phawt hnuah school ah hian admit thin an ni a, kumtin zirlai mipa naupang 50 thlan thin an ni a, chungte chu RIMC –a standard VIII-ah admit thin an ni. Candidate-te hi pawl VII zirlai kum 11.5 leh 13 inkar an ni tur a ni a, written exam chu test paper hrang hrang English (125 marks) Mathematics (200 marks) leh General Knowledge (75 marks) ah te neih thin a ni. Candidate te hian a tlem berah mark zaa 50 an hmuh a ngai a ni.