Nimin chawhnu khan Agriculture Department bultumin Chalrang Dilkhan ramah a huhova lo zawh runpui ropui tak a neih a ni a. He hun hi Agriculture Department Director Dr. C. Lalzarliana'n a hmanpui a ni. A ni bakah hian Agriculture Directorate atang officer leh thawktu dangte bakah Champhai atangin DAO leh staff leh IPRO te, Khawzawl atangin SDO (S), KVK Staff te leh ADHO ten an hmanpui a. He huna loneitute hnenah Favah sem theuh a ni bawk.

Lo zawh runpui puala programme tawite buatsaihah Dr. C. Lalzarliana chuan ram hmasawn leh changkangte changkanna chu an ram leilung hausakna nilovin a chhunga mi chengte rinawmna leh taimakna avang zawk a ni tiin, Mizoram pawh rinawmna leh taimakna in hmasawnna kan siam thei a ni, a ti a. Sorkarin buh leh thlai kan thar te a pun chhoh theih nan leitha kumtin a ngaihtuahsak thei  reng kher lo mai thei a ni tiin Agriculture Department Director chuan kan buh leh thlai thar chhuah atanga kan sum hmuh te hi engemawzat chu a kum leh a kan huan leh lo a kanmamawh tur leina atan dah then a,  intodelhna dik tak kan siamna kawng tur ani thei a ni, a ti a. Ei leh barah Mizoram intodelh a siam tur chuan mimal tin in mawhphurna kan nei a ni a tiin, loneitu kalkhawm zawng zawngte chu hlawhtling turin a duhsakna a hlan a ni.

Lo zawh programme kaihruaitu Pu Lalthanzuala,Champhai DAO kalchhuak ta chuan Dilkhan ram chu Champhai District chhunga RKVY hnuaia Improved Jhum an kalpuina zinga Chalrang leh New Chalrang khawtlangin lo zau khat an neihna hmun a nih thu tarlangin, a huho a lo zawh na hun hlimawm tak an hmang thei chu lawmawm a tih thu a sawi a. Champhai DAO thar Pu RK Nithanga'n thu a sawi bakah Pu H. Lalremruata, Khawhai Circle Officer hnen atangin Technical Report ngaihthlak a ni a. Chalrang leh New Chalrang VC theuh te atangin thusawi tawi ngaihthlak a ni bawk. Ruai nen hun lawmawm tak hman a ni.

Chalrang khuaa chhungkaw 94 leh New Chalrang khua a chhungkaw 49, chhungkua 143 ten a huhova lo an neihna hmun Dilkhan ram, Chalrang khua atanga km 10 vel a hla, Champhai District Agriculture Department in Improved Jhoom an kalpuina ram zau zawng hi Hectare 200 chuang zet a ni a, Agriculture Department hian loneituten buh hlawhtling taka an thar theihna turin Leitha, Fertilizer te an pek bakah chhungkaw engemaw zat chu Changkham tir an ni bawk. Loneitute hian a tlangpuiin Tin 3 hmun vel lo an nei a, Pu Vanlalzauva, New Chalrang chuan lo nei zau berin lo Tin 5 hmun chuang a nei a, loneitute hian Fazai, Phulbuh, Idaw, Phaingam, Teikhang leh Fazu an ching tlangpui a ni a. Dilkhan rama buh chingtute hian buh tin 28,000 vel an thar phak an beisei thu an sawi a ni.