Vawiin chawhma dar 11:00 khan Rampum faina leh Thianghlimna atan hmalakna kal mek "Swatch Bharat Mission (Clean India Mission)" hnuaiah  "Cleanliness Campaign Week 2015" hawnna   New Serchhip YMA Hall-ah  neih ani a, He hun hi Er Lalhruaia, Sr. Executive Engineer,PHED ,Serchhip WATSAN Division in kaihhruaiin Pu Roluahpuia,Chairman, Joint VC Serchhip chu khuallian a ni.

Vawiin a Cleanliness Campaign Week hawnna ah hian khuallian  Pu Roluahpuia chuanVillage Council hruaitu te chu khawtlang tana hmalakna kawng engkimah a sulsutu leh hmahruaitu an ni tih inhriat a pawimawh thu leh a thawkchhuak hmasa a tang zel tur an nih thu a sawi a, Faina leh Thianghlimna awmze neia an kalpui dan chu an nihna tak tak tarlangtu pawimawh ber anih thu a sawi bawk.

Pu R.L.Chhuanawma, President, Sub-Headquarters YMA, Serchhip District pawhin YMA leh Sawrkar in Veng / Khua faite  lawmman siamin a endik thin a, amaherawhchu lawmman siama endik anih chhung chauh kan Veng/khua te hi a fai  thin emaw tih mai tur hi a ni thin a, faina chu kumtluan atan a ni tur a ni a ti a; In leh a vel mai bakah kan taksa  te fai leh hrisel taka kan vawn angai ani tiin, chhungkua awmkhawm chuan khawtlang a siam a, chhungkaw tinten faina leh thianghlimna kawnga theihtawp kan chhuah chuan kar lovah khawtlang fai kan ni mai dawn ani a ti bawk.

Serchhip District chhungah hian Inthiarna thianghlim leh mumal laneilo chhungkua 422 tunah hian la awmin Swatch Bharat Mission hnuaiah hian hengmite hi Inthiarna  tur ngaihtuahsak mek anni bawk

"National Cleanliness Campaign Week 2015" hi September ni 25, 2015 leh October ni 2, 2015 inkara neih tur niin, October ni 2, 2015 ah he Campaign kharna inkhawm hi buatsaih a ni ang.

Vawiin "Cleanliness Campaign Week" hawnna ah hian Serchhip District a Sawrkar Pisa enkawltu Head of Department te, Serchhip khawpui chhung VC member, YMA  leh MHIP  te leh Chanchinbu mite thahnem tak an tel a ni.