Central YMA leh Mizoram Information Commission te tangkawpa huaihawt Right To Information (RTI) Act Awareness cum Media Workshop chu vawiin khan CYMA Hall, Tuikhuahtlang ah neih a ni.

Awareness Campaign hmanpuitu Pu Laldingliana, IFS(Rtd) Chief Information Commissioner chuan RTI chu mitin chanvo, a duh apiang hman theih a nih thu a sawi a. Mipui ten RTI an hman tangkai theuh theih nan mitin huap pawl leh khawtlang tana thawktu YMA nena thawhho chu thil tul leh pawimawh tak a ni, a ti a, rah duhawm leh hlawk tak a thlen ngei a beisei thu a tarlang bawk. RTI chu sawrkar leh mipui inkar thlunzawmtu, sawrkar khalh ngiltu, hlemhletna umbo tu, mipui ten an chanvo dik tak an chan theihna hmanrua tangkai tak a ni tiin YMA member kalkhawmte chu midang tanpuitu, chanhaite puitu ah an tan theih nan RTI hmang tangkai theuh turin a chah bawk. Ram pumah kum tin RTI hmanga zawhna nuai 45 vel a luh thin thu sawiin Pu Laldingliana chuan Mizoram ah pawh kan chhawr tangkai mek thu leh kan inzirtir uar deuh deuh a tul thu te a tarlang bawk. Mizoram siamthat nana RTI hlawk taka kan hman tlan theih nan YMA chu thawhpui chhunzawm zel atan a sawm bawk a ni.

RTI Act Awareness cum Media Workshop hi CYMA Literature Sub Committee Chairman Pu Roneihthanga’n a kaihruai a, CYMA Finance Secretary Pu Lalrochuanga Pachuau-in thusawina hun a hmang bawk. CIC hi Pu Vanlalngena, Secretary MIC-in a tawiawm a, RTI zirhona ah hian Aizawl khawpui chhung Branch YMA tin aiawh an kal a, Branch YMA Library-a dah atan RTI lehkhabu pek vek an ni bawk.