3001/2022-2023
Aizawl the 9th December 2022 : Mizoram State Rural Livelihoods Mission (MzSRLM) leh Rural Development Department buatsaih, thingtlanga kut hnathawktu hmeichhiate kut chhuak zawrhna, Sale of Articles of Rural Artisans Society (SARAS) Fair vawi sarihna chu vawiin khan Assembly Annexe Conference hall-ah Rural Development Minister Pu Lalruatkima’n a hawng a.

Khuallian hi MLA te Dr. ZR Thiamsanga, Pu Zothantluanga leh AMC Deputy Mayor Pu R. Thanglura leh midangten an tawiawm a ni.

Khuallian Pu Lalruatkima chuan Saras Fair chhim tura lo kal zawng zawng te chungah lawmthu a sawi a. Sawrkar chuan thingtlanga chengte chawikanna tur schemes leh programme hrang hrangte a ngai pawimawh a, theihtawp chhuahin ruahmanna a duang zel a ni, a ti a. Minister Pu Lalruatkima chuan chhungkua leh khawtlang chawikang thei kum 2013 khan MzSRLM chu sawrkar-in a din thu a sawi a; MzSRLM hnuaia Self Help Group (SHG) member ten thahnem ngai takin an thawk thin chu lawmawm a tih thu leh harsatna hrang hrang pawh an tawng thin tih sawrkar chuan a hriatpui a, an harsatnaah MzSRLM chuan SHG member te a chhawmdawl zel dawn a ni, a ti a. SHG hi bank a inngat an ni a, loan petu bank a hnathawkte an pawimawh hle a ni, a ti a. Minister Pu Lalruatkima chuan SHG rintlak taka kalpui te chuan hamthatna dang pawh an hmu zel a, an la hmu zel dawn bawk a ni tiin a sawi a. Sawrkar chuan AGEY te ruahman-in SHG ten an chakhai lam nan, damdawi in an panna leh an eizawnna tihhmasawnna tur atan motor 48 lai vailiam a ni tawh a ni a ti a.

Khuallian chuan heng bakah hian MzSRLM hnuaia SHG member lo neih leh ranvulh lama eizawngte tan hmalakna hrang hrang kalpui niin an kutke ngeia an din theihnan training hrang hrang pek thin a. Hemi bakah Community Investment Fund (CIF) leh Bank loan kaltlangin hmalakna an kalpui mek bawk a ni a ti a. Kut hnathawh lam mai bakah thalaite tana kut themthiamna leh eizawnna pe thei turin DDU-GKY pawh kalpui mek a nih thu sawiin he DDU-GKY hnuaiah hian zokhaw lama thalaite chu eizawnna tlaka an thiamna tah hriamsak leh hna hmuhsak thlengin hma lak a ni a ti bawk. Minister chuan SHG memberte chu tunlai mil zela thiamna nei thei tura training-te leh hmanruate pek an ni a, heng mai bakah hian Bank dawr dante, sum khawldante bakah faina chungchang thlengin, gender discrimination chungchanga an dikna chanvo humhalh dan thlenga hriatna pek leh zirtir an ni chho mek zel a ni tiin vawiin a SARAS Fair hlawhtling taka hmang turin duhsakna a hlan a ni.

He fair hawnnaah hian Pu R. Zarzosanga, IAS, State Mission Director, MzSRLM leh Secretary, Rural Development chuan inlawmna thu a sawi a.

He hunah hian Award sem a ni a, Award semte hi Best Community Cadres (IBCB/FI/Farm/Non-Farm) hnenah pek an ni a. Hei bakah hian kum 2019-20 chhunga MZSRLM hnuaia Block tha bera thlanchhuah pathum RD Block, Reiek RD Block, W.Phaileng RD Block leh Bunghmun RD Block chu award hlan an ni bawk a. Heng RD Block pathumah hian Financial Inclusion leh MzSRLM hnuaia hnathawh tur target an zawh fel fai that avanga hlan an ni a.

Lawmman dang, Champion Bankers chu mi pathum- Pu Andrew C. Ngaihte, MRB Kawrthah Branch Manager; Pu H. Lalramdina, Co-operative Apex Bank Siaha Branch Manager; Pu H.Vanlalbiaknia SBI Ngopa Branch Manager hnenah loan semchhuah-a an hnathawh that avangin pek an ni.

Best VO pathum thlanchhuah a ni a, chungte chu- Sangau VO-II, E.Lungdar VO-I, Chungtlang VO te an ni a. Self Help Group- tha pathum- Sipai Lui SHG (Khawzawl RD Block); Pangpar Bawm SHG (Ngopa RD Block) leh Chuailo SHG (Khawbung RD Block) te hnenah lawmman pek an ni.

Pu Zoremthara Ralte, Dy. Secretary, RD Department chuan lawmthu sawiin SARAS Fair hawnna hi a khar a ni.

SARAS Fair, 2022 ah hian RD block atangin Self Help Group member mi 200 dawn ten stall an hawng a. Stall bakah Food Court pawh hawn niin MZSRLM hnuaia SHG member te thil siam leh thar chhuah hrang hrang handloom, handicraft, thlai rep chi hrang hrang, pickle, chawhmeh leh thei tharlam tak tak te man man zawka hralhchhuah tura phochhuah a ni.

SARAS Fair hi Ni 9th -17th December, 2022 chhungin Multi Level Parking, Tuikual South a neih tur a ni a. MzSRLM hnuaia Self Help Group (SHG) member hrang hrangte’n an thil thar leh siam chhuahte an zuar a ni.