3002/2022-2023
Khawzawl, the 9th December, 2022: Riangtlei Branch YMA Rising Day vawi 77-na lawmna hun, Chhinlung Community Hall, Riangtleia hman chu vawiin chawhma dar 11:00 khan Deputy Chief Minister Pu Tawnluia chuan khuallian niin a hmanpui.

Khuallian Pu Tawnluia chuan Pathian kaihhruaina changa Riangtei Branch YMA in kum 77-na hmel a hmu chu lawmawm a tih thu sawiin, a lawmna hun hmang tura an sawm avangin lawmthu a sawi a. Hun engemawchen hrisel lohnain a tlakbuak hnuah a bial chhunga Riangtlei khaw mipuite nena hun hlimawm tak hmanho a ni thei chu vanneihthlak tiin, an thlawpna leh duhsak thinnaah lawmthu a sawi a. Kalkhawmte chu hnam dangte thil thar leh dehchhuah ngaisanga pholang ringawt lova, mahni kuthnathawh hmanga intodelhna chawisanga phochhuah kawnga tan la deuh deuh turin a chah a. Mizo mipui te'n kan mizona rilru zahpui hauh lova kan phochhuak thin hi a ropui a, kan hnamin kan ngaihhlut hi a lo hlu mai thin a ni, a ti bawk.

Riangtlei khuaah PHE Department hmalaknain tuilakna tur buaipui mek anih thu leh a bial chhunga khaw tinah tuilakna mumal leh tha tak buatsaih mek zel anih thu tarlangin, Riangtlei khua chawm turin Raifan lui tui nizung chakna (solar pumping) hmanga lak kan tum a, kan dilnate Sawrkar laipuiin min remtih sak tawh a, tunah hian financial sanction kan nghak mek a ni, a ti a. Tuipui kama Riangtlei ram leilet neihna atana hmun tha tak, thlai thar chhuah nana duhawm tak pawh chhawr tangkai thei turin Riangtlei to Tuipui Agriculture Link Road tender tih fel vek niin work order tihchhuah tuma buaipui mek a ni, a ti bawk.

Deputy CM chuan Sawrkar flagship programme chhungtinte chawikanna tur tinzawna hmalakna Family Oriented Socia Economic Development Policy (SEDP) thawhkhatna sem chhuah tawh anih thu sawiin, hamthatna dawngtute chu tanpuina an dawnte tha taka hmang tur leh intodelh nana hman tum turin a chah a; nakum sawrkar kum tharah SEDP thawhhnihna pawh sem leh tum a ni, a ti a. A bial chhunga kuthnathawktute hmalakna kaltlanga hlawhtlinna hrang hrang hmuh tur a awm leh thil tharchhuahte ram pawn thlenga thawn a ni chu chhuanawm a tih thu sawiin, Tualte-ah hlawhtling taka Tomato thar anih thu leh a sawngbawlna ketchup siamna khawl bunfela siam chhuah tan mek zel anih thu te, Sialhawk khuaah Lakhuihthei thahnem tak thar chhuah anih thute a tarlang a. Sapthei that duhna khua Khawhai leh Chawngtlai-ahte uar zawka hmalak tum anih thu a sawi bawk a. Tunah hian a hralhna tur market a inhawng mek zel a, beiseina sang tak nen kan thlir mek a ni, a ti a. Riangtlei Branch YMA te an kalzelna turah duhsakna a hlan nghal bawk.

Thusawitu dang District Bawrhsap Pu C.C. Lalchuangkima chuan khaw taima leh fai tak an ni chu chhuanawm a tih thu sawiin, Riangtlei khaw mipuite chu faina leh thianghlimna chhawmnung zel turin a chah a. Khawzawl District-ah PMGSY kawngin a la pawh ve loh khua 2, Pamchung leh Riangtlei khuate a awm thu sawiin, PMGSY 2 hi zawh fel tep a ni a, a fel hunah chuan Riangtlei leh Pamchung pawh hi hmalakna leh turah an telh ngei kan beisei a ni, a ti a. Sevulh kawnga Riangtlei khaw hmalakna fakawm a tih thu sawiin, Sial chu Mizote ran ngaihhlut leh a hralhna lama harsatna awm lo anih avangin theihtawp chhuaha sevulh kawnga tan la zel turin a fuih bawk.

Khuallian hi Tlakveng zawlah Riangtlei Branch YMA Committee Member Pu K.Vanlalngheta kaihhruaiin lo hmuah a ni a. Hemi hnu hian Riangtlei Community Hall-ah Rising Day vawi 77-na lawmna hun hman chhunzawm nghal a ni. He hun hi Pu David Lalnunmawia, President, Riangtlei Branch YMA chuan a kaihruai a. Pu Lalrosanga, Vice President-in kalkhawmte lawmna thu a sawi a. Pu F.Aithanga hnen atangin thusawi ngaihthlak a ni bawk a. Pu K.Lalremruata, Vice President, Riangtlei VC-in lawmthu sawiin hun a khar a, tlaiah Rising Day lawmna ruai kilho a ni.

Deputy Chief Minister hi Pu Lalvenhima, Addl. DC; Pu Lalringliana Pachuau Addl. SP; Pu Obed Lalmalsawma SDC leh PHE Department atangin Er. Liantluanga Chohte, EE leh Er. Elijah Vanlalpeka, SDO te'n an tawiawm bawk a ni.