No.2154/2021-2022

Aizawl, 7th September, 2021 : Rural Development Minister Pu Lalruatkima chuan vawiin chawhnu khan Aibawk-a Rural Mini Sports Complex chu a hmunah tlawhin Aibawk khawtlang hruaitute leh department hotute nen he mini sports complex atana hmalak tawh chin leh tuna a dinhmun te an sawi ho. 


Aibawk Mini Sports Complex hi NLCPR hnuaia khelmual project 4 zinga 1 niin kum 2019 khan hmalakna bul țan a ni a. He project atana sum ruahman nuai 413 ah nuai 13 chu DoNER ministry in lo cut in nuai 400 sanction ah first installment atan nuai 180 lacs hmuh a ni tawh a. Kum hnih chhunga thawh zawh tura ruahman niin PWD engineer te enpuina hnuaiah NECS in mini sports complex sak hna hi an thawk a. Project hna 80-90% vel thawh zawh tawh a ni.

Pu Lalruatkima chuan Aibawk leh a chhehvel khua ten khelmual tha an neih chu sawrkarin a duhsakin he khelmual nei tur hian Aibawk khawtlang mipui te, a changtu RD department leh hna viltu PWD te bakah Contractor te pawhin theihtawp an chhuah tih a sawi a. Hripui avanga central sorkarin sum rawn pek chhuah zung zung an harsat thu leh hemi avanga project tangkhang a tam thu sawiin tunah erawh chuan he khelmual sak chhunzawmna tura DoNER Ministry in sum 2.6 crores a rawn release leh mek thu leh, hna pawh chak taka thawh zui leh thuai a nih tur thu a sawi a. Aibawk chu India rama RD Block tha ber a nih thu leh sawrkar pawhin Aibawk leh a chhehvel khua te tih hmasawnna tur ngai pawimawhin hmachhawp lian tak tak a neihte chu a tarlang a. He mini sports complex sak mek pawh Aibawk khawtlang mipui ten uluk taka hnathawh te lo vilpui turin a chah a ni.

Minister hi Bialtu MLA Prof.Lalnunmawia Vice Chairman Horticulture Development Board leh RD Director Pi Florence Zotluangpuii leh official dang ten an tawiawm a. Bialtu MLA Prof.Lalnunmawia chuan Aibawk mini sports complex sak mek chungchangah khawtlang mipui te rilru tihnual thei zawnga thuthang dik tawk lo leng vel chu pawi a tih thu sawiin he khelmual atan central sawrkarin sum a rawn release leh mek hmanga hna chhunzawm thuai turin office lamah paper work chinfel ngaite buaipui leh mek a ni, a ti.

He project viltu Pu Chhalai EE, PWD chuan Aibawk mini sports complex sak hna bul intan dan a chinchhuaka sawiin technical report a pe a. Aibawk khawtlang aiawhin VCP Pu Rosiaman lawmthu a sawi a. NECS lam atangin mini sports complex sak chhunzawm lehna tura inbuatsaihna kalpui mek dan ngaihthlak a ni bawk.

Attachment

  • Loading attachment...