Sorkar laipui ruahmanna hnuaia ramri dep khuate tih hmasawnna tur Border Area Development Programme (BADP) leh district hnufual dawm kanna tur Backward Regions Grant Fund (BRGF) kengkawhtu D.C. leh BDO te chu vawiin chhun khan R.D. Minister Pu R. Lalzirliana hovin ama office-ah an thukhawm a. An hmalakna leh hmabak an neih te thlir hovin harsatna hrang hrang an neihte pawh sawi ho a ni.

Minister chuan BADP leh BRGF thil tum sawi nawnin thingtlang mirethei leh hnufual deuh deuhte chawikanna tur anih dawn avangin heng atana sum te chu dik tak leh a daihzai thei ang bera hmang turin BDO te chu a hrilh a. Sawiselna leh inpuhmawhna hrang hrang awm thei lakah ding nghet tlat tur leh dik taka hna an thawh chuan sorkar chu an lamah a tang tlat ang a ti. Sorkar hmalakna reng reng hlawhtlinna chu politician te chungah nilovin sorkar hnathawkte rinawmnaah a innghat zawk a ni a ti a, an hmalakna theuhah a hmun ngei a kal a hnathawh dan vil ngun turin a hrilh bawk.

He hun a Minister tawiawmtu Parliamentary Secretary Pu Lalrinmawia Ralte pawhin hnathawh duhthusam loh thin nachhan chu a hmun ngeia enpui a tlem thin vang a ni a ti.

Minister hi Rural Development Secretary Pu Vanengmawia leh official dangten an tawiawm a ni.