DIRECTORATE OF INFORMATION & PUBLIC RELATIONS, Government of Mizoram, India

928/2022-2023

Phullen 16th June, 2022 : Rural Development Minister Pu Lalruatkima chuan zanin khan Mizoram Rural Livelihood Mission (MzSRLM) kaltlanga pek Phullen RD Block a Village Organization pahnih Luangpawn leh Phullen VO hnuaia kuthnathawktute hman tangkai tur buh herna khawl leh hnim sam faina (grass cutter) a sem.

Zanina he hmanraw semna inkhawm Phullen BDO Hall-a buatsaihah Pu Lalruatkima chuan thu sawiin Phullen leh Luangpawn khawtlang inlungrualna leh inpumkhatna vangin hmasawnna hmuh tur a tam a ni, a ti a. MzSRLM hian kum 10 em la tling lo mahse hmasawnna hmuh tur a tam hle a, RD block din sa 26 ah hna tha taka hmuh tur an thawk hi a lawmawm a ni, a ti a.

MzSRLM in a tum ber chu, a bik takin thinghlang hmeichhia ten lei rem an rah a eizawnna ngelnghet an neih theihna tura tanpui a ni, a ti a. MzSRLM hnuaiah hian Self Help Group 8000 chuang awm mekin, Village Organization 640 chuang kan nei a, Cluster level federation 26 hnuaiah chhungkua 70000 chuang telin MzSRLM hmalakna kaltlang mi tam takin eizawnna mumal an nei thei ta hi a lawmawm a ni, a ti.

Pu Ruatkima chuan Custom Hiring Centre kaltlangin kuthnathawktu hmeichhiate tan hmanrua chi hrang hrang man tlawm zawka hlawh theih tura ruahmanna siam a ni a, taima te tan eizawnna tha tak kawng a sial sak a ni a ti a. CHC kaltlanga loan la te tan loan rulh that a pawimawh tih kan hriat a ngai a, kan rulh that loh chuan midang he tanpuina chhawr tangkai turte kawng kan dang ping thei a ni, a ti a. SHG kaltlangin sawrkar ruahmanna zawm chungin rilru nei taka kan thawh a ngai a, hmanruate hi dimdawi taka fimkhur taka kan hman a ngai a, midangte pawhin an la hmang tangkai ve duh tih hria in, kan taimak chuan kan ramah hian eitling a awm a ni a ti a, hmasawnna tura sawrkarin bultanna min pek hi tangkai taka hman tumin, midang en lova an hmuh china an chhawr tangkai dan tur ngiaihtuahna felfai tak nen rilru nei taka thawk turin a chah a ni.

Mizoram State Rural Livelihood Mission CEO Pi H. Lalchhandami pawhin thu sawiin Custom Hiring Tools an sem chu Community Investment Fund (CIF) atanga pek an ni a, a bik takin SHG ten an eizawnna kawnga awlsam zawka hna an thawh theih nana an hawh tur (loan) atana pek an ni a, mimalin duh duha an kawl theih a ni lova, a duh apiangin man chawiin an hawh thei a, hei hi khawl inchawmna tur atan hman tur a ni, a ti a. A nihna tur ang taka tangkai taka hmang turin a chah a ni.

Phullen RD Block MzSRLM hnuaiah hian Khaw 31 awmin SHG 299 an awm a, chhungkaw 2245 an awm a ni.

Attachment