1142/2024-2025

Aizawl dated 11th July 2024: Vawiin chawhma khan Rural Development Conference Hall, Chanmari ah North Eastern Council hnuai a Rural Monitoring & Information System kalpui nana Computer set leh hmanraw dang te sem chhuahna hun hman a ni a. RD Minister Prof. Lalnilawma chuan he hun hi hmanpuiin Pu K.Lalrohlua, Director, Rural Development Department chuan hun a kaihruai a ni a. Pu A.Chhalai, Executive Engineer chuan Technical report a pe bawk a ni.

Minister Prof. Lalnilawma chuan Rural Development Department tih changtlun nana RMIS (NEC) a tak a hman theih tur a ruahman a ni ta chu a sul lo su hmasatute thawhhrimna leh inpekna vang a nih thu sawiin a thil tum tih hlawhtlin ngei a nih theih nan tun a thawktute an pawimawh hle thu a sawi a. Mipuiin Rural Development Department awlsam zawk a an dawr theih nan leh hmasawnna hna sawt zawk a kalpui a nih theih nan RMIS chu tangkai tak a hmang tur a chahin RD Minister chuan a nih dan tur ang tak a hman a nih theih nan thawktute pawhin a hman dan zir thiam tum vek turin a chah bawk a ni.

RD Minister chuan Rural Development Department chu thingtlang khawsak dinhmun chawikan leh tih hmasawn hna thawktu an nih angin Mizorama khaw hrang hrang a harsatna awm te zirchiang turin an awm kual tam a pawimawh thu a sawi a. Ruahmanna tha siam tur chuan thawktuten tawnhriat an neih tam a tul thu a sawi a ni. Prof. Lalnilawma chuan Rural Monitoring & Information System kalpui bungrua te chu tangkai tak a hman a nih theih nan RD Secretariat, Directorate of RD, DRDO Office 11 leh RD Block Office 28 aiawh a lo kalte hnen ah a hlan nghal a ni.

NEC Scheme hnuai a Rural Monitoring & Information System (RMIS) Project hian RD Secretariat, Directorate of RD, DRDO Office 11 leh RD Block Office 28 te tan Computer 55 leh a kaihhnawih hmanrua dang te, Software Development-te, Server System-te leh Project atan a Skill Development Training a huam a. RMIS Project hi Nuai 249.00 hu niin NEC atangin 1st leh 2nd Installment atan nuai 200.096 hmuh tawh a ni a, nuai 48.904 hmu leh tur a beisei a ni. He Project hian a tum chu Rural Development Department hnuai a Office hrang hrangte software application hmang a thlunzawm a ni a, RD Department hnuai a hma lakna tha zawk leh chak zawk a kalpui a nih theihna atan a ruahman a nih thu Technical Report-ah hian tarlan a ni.

RMIS hnuai a bungrua sem chhuahna hun hman zawh hian RMIS hmang a hnathawh dan hrang hrang entirna hun Director, Rural Development Department pisaah neih leh a ni a. RD Minister hian Directorate of Rural Development building fang kualin thawktute nen inkawmhona hun a hmanpui bawk a ni.