1143/2024-2025 

Dated Serchhip, the 11^th July, 2024: Serchhip DC kaihhruainaa din District Task Force on Child and Adolescent Labour chuan vawiin khan Serchhip khawpui chhung hmun hrang hrang tlawhin dan kalha naupang chhawr luih - child labour a awm leh awm loh an enfiah. Tukin zing dar 10:30 khan an Chairperson Pu Paul L.Khuma, Serchhip DC chuan Serchhip DC Office tualzawl atangin fehchhuak te hi a vailiam a ni.

He Task Force-ah hian police te leh sawrkar department hrang hrang official te bakah tlawmngai pawl hruaitute an tel a. Vawiina fehchhuak zingah hian Serchhip Sub Headquarters YMA hruaitute, police te, I&PR te leh Serchhip District Child Protection Officer leh a staff te an tel a ni. New Serchhip area atanga bul tanin kawngpui dunga dawr te, thingpui dawr te, hotel te, workshop te an tlawh chhuak a. Heng hmunah te hian naupang kum tling lo hnathawka chhawr an awm em tih an enfiah a ni.

Kum tling lo naupang/tleirawl hnathawka chhawr Child and Adolescent Labour leh Child Trafficking chungchang inzirtirna Sensitization Workshop hi July ni 9, 2024 khan Serchhip DC Pu Paul L.Khuma hovin Serchhip DC Conference Hall ah neih a lo ni tawh a. He hunah hian Serchhip DCPO Pi Lalsiampuii leh Pu Lalrinhlua, Advocate ten Child and Adolescent Labour leh Child Trafficking chungchang zirtirna an pe a. He hunah hian sumdawng te, bazar nuho te leh a kaihhnawih dang te sawm an ni.

Naktuk July ni 11 hian District Task Force on Child and Adolescent Labour te hi a tum hnihna atan an thawk chhuak leh dawn a ni.