2215/2023-2024

Aizawl, the 9th October, 2023: Rural Development Minister Pu Lalruatkima chuan tukin khan Sairang Dinthar Community Hall leh Sairang Community Hall-te chu khuallian niin a hawng. He hun hi Manpower Development Board Vice Chairman Pu Zothantluanga, Aizawl West I bialtu MLA ni bawk chuan khualzahawm niin a telpui bawk.

Khuallian Rural Development Minister Pu Lalruatkima chuan Sairang Dinthar leh Sairangin mamawh huna khawtlang mipui punkhawmna tur hmun pawimawh tak Community Hall changtlung tak an nei chu a lawmpui thu sawiin, Sawrkarin khaw tlawmngai leh tanpui ngaite tana pen chhuak thin Sairang leh a chhehvel khuate hmalakna chhuanawm a tih thu a sawi a. Kalkhawmte chu ram leh hnam hmangaihna leh dahsanna thinlung pu tlat tura chahin, hnam, ram leh sakhua humhim bakah tlawmngaihna, huaisenna, rinawmna leh taimakna nena kan ram kan enkawl chuan kan intodelhin kan ram a dam ang a, kan dingchhuak thei dawn a ni, a ti. Mipuite chu ram leh hnam, sakhua leh ziarangte humhim nana tih theih neih angte leh mahni kova tla mawhphurhnate tha taka hlen chhuah tum theuh turin a fuih bawk.

Rural Development Minister chuan Ministry of Rural Development-in tehkhawng a siam hrang hrang hmanga India rama Rural Development Department titha thlan zinga pahnihna dinhmun Mizoramin a hauh chu lawmawm a tih thu sawiin, hemi puitlin tura theihtawp chhuahtute fakawm a tih thu a sawi a. RD Department chuan thingtlang khua leh a chengte'n leirem an rah theih nan kawng hrang hranga hma a lak thin thu sawiin, ni 100 inhlawhna bahlah hauh lova hripui lenlai pawha kalpui a ni leh tangkai taka hman a ni chu lawmawm tiin, Sawrkar hmalakna puitlin kawnga thlawp tlattu mipuite fakawm a ti a. Petroleum Oil Lubricant (POL) Depot lian, Petrol leh Disel thahnem tak dahkhawlna Sihhmuia siam tura hmalak mek a nih thu leh Mualkhang Gas Bottling Plant tih len tum a nih thu a sawi bawk.

Sairang khaw mipuite taimakna leh thawhrimna chhuanawm a tih thu sawiin, an inpekna, tlawmngaihna leh thahnemngaihnate chu zoram mipui fak rawn a ni, a ti a. Hun harsa leh khirh tak tak Covid-19 hripui leng, ramri buai, thenawm ram buai, lirnghing, vawk hri, ram kang leh rokhawlhna dangte avanga harsatna thleng karah Sawrkarin theihtawp chhuaha hma a lak dante a tarlang bawk a. Khawtlang mipuite chu Community Hall hawn takte chu neitu thinlung pua uluk taka enkawl turin a chah nghal bawk.

Khualzahawm Manpower Development Board Vice Chairman Pu Zothantluanga, Aizawl West I bialtu MLA ni bawk chuan Sairang huam chhung veng hrang hrang leh khuate chu khaw tlawmngai tak, an huamchhunga chhiat tawhna hrang hrangte buaipuia ruang tuamhlawm leh thawn chhuah kawnga hmalatu pawimawh tak an nih thu sawiin, tui tla, road accident leh rail kawng siama thawkte chhiat tawh buaipui a nih dante chu ropui a tih thu a sawi a. A tul angte buaipui kawnga pawimawh tak Community Hall tha leh changtlung zawk Sawrkar hmalaknaa puitlin a ni ta chu lawmawm a tih thu a sawi a. Sairang Dinthar M/S Sawrkar School-a hlankai a ni te, Sairang HSS leh John Memorial H/S Provisional Adhoc GIA hlankai a ni te, Rural Tribal Girls' Hostel, Sairang hawn a ni te, FCI Godown sak mek a ni te, cheng nuai 920 chuang senna tur AMRUT 2.0 kaltlanga Sairang huam chhung vengq 3 te tana tuilakna project kalpui thuai tum a ni te chu lawmawm a tih thu a sawi bawk.

Sairang Dinthar Community Hall hawnna hun hi Pu Sangkunga, VCP Sairang chuan kaihruaiin Maj. Remruatzauva'n hunserh a hmang a. Sairang Community Hall-a hun hman hi Sairang VCP Tv H.Laldingliana'n kaihruaiin Rev. K.Zonunsanga'n hunserh a hmang a. Pu Lalnundika, Project Director, DRDO Aizawlin technical report a pe a ni.

Sairang Dinthar Community Hall sak that hna hi cheng nuai 20 sengin BDO Tlangnuam kaltlanga thawh a ni a, a dung feet 80 leh a vang feet 30 a zau a ni. Sairang Community Hall sak that hna hi BDO Tlangnuam hnuaia thawh niin, cheng nuai 25.50 sen a ni a, a dung feet 70 leh a vang feet 30 a zau a ni. Community Hall pahnihte hian mamawh hrang hrangte a kengtel nghal bawk.