Vawiin khan Rural Development Minister Pu Lalruatkima chuan New Delhi-ah Union Ministry of Rural Development Secretary Shri Amarjeet Sinha chu a pisa ah hmuin Rural Development Department, Govt. of Mizoram ina a mamawh leh hmalak tawh leh hma chhawp te a sawipui a ni. An inkawmnaah hian RD Minister hian RURBAN Cluster siam belh chungchang pawh Minister hian sawipui bawkin, Secretary hian a tul anga hma lo lak a tum thu Minister Pu Lalruatkima hi a hrilh bawk a ni.

PMAY(G) Scheme kalpui mekah Central Sawrkar lamin Mizoram State Nodal Account chu Current Account atangin Saving Account ah let tura Mizoram Sawrkar a tih angin August Ni 8, 2019 khan sawn fel ani a. Hetih rual hian Central Sawrkar a RD Ministry lam hian tanpuina dawngtu turte Account-a pawisa chhun luhna System, PFMS (Public Financial Management System) lam anla chingfel theih loh avangin Mizoram pumpuia PMAY(G) scheme hnuaia insak tanpuina dawngtu te chuan an tanpuina dawn tur ang an dawng thei lo a, he thil hi Minister Pu Lalruatkima chuan sawipui bawkin Secretary Shri Amarjeet Sinha chuan Mizoram State harsatna chingfel tur hian a changtu official te be nghalin a rang thei ang ber a chingfel nghal turin a hrilh bawk a ni.

Kum 2019-2020 chhungin MGNREGS hnuaiah Mizoram Sawrkar chuan Rs 233.04 crore hmuh tawhin, April thla atanga September thla chhungin District tinah Ni 57 theuh inhlawh tawh ang a chawhrual theih a ni a. Union Secretary  pawh in MGNREGS hnuaia Mizoram Sawrkarin an tih that avangin Rural Development Minister Pu Lalruatkima hi lawmthu a lo hrilh a ni.

Minister Pu Lalruatkima chuan Ni Za  inhlawhna (MGNREGS) Sawrkar laipuiin a pek that avanga Union Secretary Shri Amarjeet Sinha hnenah hian lawmthu a sawi a, hemi rual hian Mizoram Sawrkar a tam thei ang ber fund Ni Za inhlawhnan pe  turin a ngen bawk a ni. Union Secretary chuan Sawrkar Laipui in Mizoram dinhmun a hriatpuia,  theihtawp a lo chhuah pui zel ang tih Rural Development Minister Pu Lalruatkima hi a hrilh a ni.