Ni 6.10.2019 (Pathianni) zana Zawlpui khuaa Pi Lalhlimpuii, a pasal Pu P.C.Vanlalringa, Indian Reserved Police-in a thah chungchangah Mizoram State Women Commission chuan nimin ni 10.10.2019 (Ningani) khan hetiang hian tuarpuina leh demna thu an chhuah a ni :

Indian Reserved (IR) Police, P.C.Vanlalringa (kum 50 vel), Pukpui, Lungei, tuna Zawlpui, Mamit District-a awm mek chu October 6, Pathianni zanah a nupui a sawisa hlum nia sawi a nih avangin police-in an man a. P.C.Vanlalringa te chhungkua hi Zawlpui IR post-ah an awm mek avangin Zawlpui khuaah an awm a, Lunglei lam mi an ni. Pathianni zan dar 9-10 vel khan a nupui Lalhlimpuii (42) chu a sawisa a, Lalhlimpuii chu a hliam tuar lovin Pathianni zan vek khan a boral ta a ni.

Lalhlimpuii hi a nakruh pathum a tliak a, a dulah hliam na tak a tuar bawk. A ruang hi Zawlnuam damdawi-inah khan endik (post-mortem) a ni a, chumi hnuah an khua, Lunglei Pukpui panpui nia thu dawn a ni. P.C.Vanlalringa chu Pathianni zan vek khan police-in an man nghal a ni.

He tualthahna-a kan hmeichhiatpui Lalhlimpuii chunga tualthatna rapthlak tak leh nunrawng taka a pasal pawmlai ngei P.C.Vanlalringa’n a that hi Mizoram State Commission for Women-in India DANPUI hnuaia Hmeichhiate humhalhna hrang hrang awmte nasa taka hma a lak laia hetiang tualthahna rapthlak lo thleng hi a pawi a tiin a dem takzet a. Tualthattu- P.C.Vanlalringa hi dan anga na taka hrem a nih ngei theih nan Mizoram State Commission for Women chuan thuneitute hnenah na takin hma a la dawn a ni.

Tin, kut tura boral ta Pi Lalhlimpuii chunga thil rapthlak tak thleng hi Mizoram State Commission for Women chuan a tuarpuiin a lainat takzet a ni.