No.6645/2020-2021 

Aizawl, the 23rd November 2020 : Vawiin khan State Employment Guarantee Council meeting chu Rural Development Minister Pu Lalruatkima hovin video conferencing hmanga neih a ni a. Minister hi Commissioner & Secretary Rural Development Department Pu Lalhmingthanga’n a tawiawm a ni.

Pu Lalruatkima chuan COVID-19 hripui lengin sum dehchhuah a tithuanawpin ram pumah sum leh pai dinhmun a nghawng nasat thu a sawi a. Thingtlanga chengte leh thingtlanga sum veivir pawh nasa takin a nghawng tih sawiin ni 100 inhlawhna MGNREGS chu tun dinhmunah thingtlang mipuite innghahna ber a nih tak thu leh an dinhmun chawikangtu pawimawh tak a nih thu a sawi. RD Minister chuan SEGC meeting chu hripui a len avangin kum dang angin a hun taka neih theih a ni lo nain video conferencing hmanga neih a ni ta chu lawmawm a tih thu a sawi a ni.

Kuminah hripuiin nasa taka min nuai avangin kum thar lamah chuan ei leh barah harsatna kan tawk dawn niin a lang, Minister chuan a ti a. Chuvangin MGNREGS atanga hmalakna tur reng rengah ei leh bar tharchhuah tih pun leh hemi kawnga hmasawnna chu uar ni se, a ti. Tun hnaia State hrang hrang te hma lakna thlirhonaah Mizoram chu MGNREGS bikah state thawk tha berte zinga a tel thu sawi lan a ni, Minister chuan a ti a, hei hian hnathawktute thawhrimna leh inpekna a tilang tiin nasa leh zuala tan la turin thawktute a chah a. Meeting-a tel te hnenah thawhhona tha tak an neih chhunzawm zel a beisei thu leh sawrkar finchhuaha thurawn te pe thin turin a ngen bawk a ni.

Meeting-ah hian kumin sawrkar kum kal lai meka MGNREGS hmalakna leh hmabak la awm te chu Rural Development Joint Secretary Pu CC Lalchuangkima’n sawiin presentation a pe a. Hemi zawh hian VEC te chawlh lailawk (suspend) laia hma lak dan tur sawiho niin hemi chungchanga rawtna siam chu SEGC chuan an pawmpui a. MGNREGS hnathawktu hlawh tihpun leh an tana EPF siam chungchang chu sawi ho chhunzawm niin SEGC chuan hlawh thar rawtna chu an pawmpui a, EFF chungchang erawh fimkhur taka zirchian ni se, an ti. MGNREGS hnuaia hnathawh te Peg System a kalpui pawh SEGC hian a pawmpui bawk a ni.

Meeting a tarlan danin kuminah hian Ministry of Rural Development atangin MGNREGS atan a vaiin cheng nuai 51513.4028  hmuh tawh a ni a, hemi atanga state matching share chu cheng nuai 2078.8228 a ni. October thla thleng khan chawhrualin District tinah ni 74 vel ni 100 inhlawhna hi siam a ni tawh a, November leh December thlaah te ni 7ve ve inhlawhna hi siam tum a ni. Job Card holder zawng zawng atanga chhutin za zelah 95.14 chu ni 8 chhungin an account-ah an hlawh a lut thin a. Kumin atana hnathawh tur 19000 atangin 15000 chu thawh zawh tawh niin e-FMS pawh za a za tihhlawhtlin a ni tawh a. Job card holder za zelah 96.56 chu MIS ah an Aadhar nen thlunzawm tawh a nih laiin za zelah 32.82 chauh an bank account leh an Aadhar thlunzawm a ni a, hei hi Bank lama hnathawktute indaih loh vang niin meeting ah sawi lan a ni.

Meeting-ah hian SEGC-a tel Department hrang hrang aiawh te, District hrang hranga DC te leh Project Director, DRDA te leh thawktu dangte an tel a ni.