No.6630/2020-2021

Aizawl, 21st November 2020 : Nimin khan Rural Development changtu Minister Pu Lalruatkima chuan Aibawk RD Cluster hnuaia Sateek leh Phulpui khuaa Shyama Prasad Mukherjee Rurban Mission (SPMRM) kaltlanga hna thawh tur ruahman te a hmun kalin Department official ten nen a en ho a ni.

Pu Lalruatkima chuan SPMRM hi Mizorama RD Block 4 ah chauh kalpui mek a ni chungin kum 2016-17, 2018-19 leh 2019-20 ah te India rampuma hnathawk tha thlan zingah Mizoram khan “Best Performing States at National Level” ah Lawmman 2-na kan la a, hei hian Department in hna an thawk tha ani tih a tichiang hle, a ti a. He scheme in khawpui hnaiha thingtlang khua te kawng hrang hranga an hmasawn theihna tur kawng dappui leh siamsak chu a tum ber anih thu sawiin tunah hma lakna thar tur a bik takin Sateek ah Wholesale Market leh Phulpui, Zawlpala Thlan panna bulah car park siam tur hi a khaw mipuiten kawng hrang hranga an chhawr tangkaipui a beisei tih a sawi.

Pu Lalruatkima leh RD Department official te hian Sateek bul, Darlung panna peng bulah Wholesale Market sakna tur hmun an en a, he hna hi thla thar lamah tan beisei a ni a. Sateek Community Hall cheithatna tur leh Futsal Ground siamna tur te pawh an en bawk a. Hemi hnua hian Phulpui khuaa Zawlpala Thlan panna bula car park leh rural tourism atana thil tangkai te siamna tur hmun te pawh an en leh nghal a. Minister chuan helai hmun hi khualzin te hipna tha tak nia a hmuh thusawiin a 'originality' ti chhe lovin, car park hi siam tum a ni a, khualzin tlawhtu an tam chuan a khaw mipui te tan eizawnna thar te pawh a in herchhuah theih thu a sawi bawk.

Minister hi RD Department Joint Secretary, Project Director DRDA Aizawl leh BDO Aibawk ten an tawiawm a ni.

SPMRM hi Rural Development Department hnuaiah heng RD Block pali-ah te hian kum 2016 atang khan kalpui tan a ni – Aibawk(2016), Thingsulthliah (2017), East Lungdar (2017) leh Khawzawl (2017) RD Block ah te.  

Kum 2016 atanga tan SPMRM  in a tum ber chu India rama State-te leh UT ah te khawpui hnaiha awm thingtlang khua, khawpuia hmasawnna leh changkanna awm anga dawm kang thei tura ngaih khuate thlan chhuah a, tihchangtlun leh zual a ni a. Ram pumah RD Block 300 chuang  ah kalpui mek a ni.

Rurban Cluster-a hmalakna tur atan project fund kalphung hi- 70% hi Convergence hmanga sawrkar Scheme hrang hrang dang atanga sum huikhawm leh a bak 30% chu Sawrkar laipui atanga lokal, Critical Gap Funding (CGF) hmangin hmalak a ni.