No.671/2020-2021

Kolasib, Ni 29 April, 2020: Vawiin khan Pu Lalruatkima, Rural Development Minister chuan Kolasib district khaw hrang hrang a Village Level Task Force duty-te an duty-na hmunah a tlawh. Pu Lalruatkima hian Thingthelh, Bukpui, North Hlimen, Saipum, Saiphai, Phainuam leh Saihapui ‘V’ te a tlawh a ni.

Pu Lalruatkima chuan, "COVID 19 hripuiin min nuai mek a, he hripui kan dona atan a lungthu pathum - Sorkar, Kohhran leh tlawmngai pawl kan neihte hi an hlu tak zet a. He kan lungthu pathumte avang hian he hripui lakah hian kan him a, he hun harsa hi an zarah harsatna lian lutuk tawk lovin kan paltlang ngeiin ka ring," a ti a. Mipuiin sawrkar thu an zawm tha chu lawmawm a tih thu sawiin, "Kan tanrualna rah liau liau avangin he hripui hi kan hneh ngei ang tih ka ring a ni," a ti bawk.

Pu Lalruatkima chuan, "He hun harsa kan tawh mek lai hian tumah chhuanchham a an awm kan phal lo a, chhuanchhama awm an lo awm palh ang tih kan hlau hle,” a ti a, hemi kawng ah hian Sawrkarin theihtawp an chhuah thu sawiin "He hun harsa kan tawh mek hi malsawmnaah chantir ang u. Buhbal leh thlai ching uar lehzual ila, indodelhna atan rahbi pawimawh ah he hun hi i hmang ang u," a ti.

Minister chuan he hri dona kawnga Chief Minister Pu Zoramthanga hmalakna chu ropui a tih thu a sawi a. Chief Minister ruahmanna felfai tak avangin Minister leh MLA te a tul apiang ah khaihlak awm lovin, an thawh chhuah thin thu a tarlang bawk a ni.

Serlui Bialtu MLA Pu Lalrinsanga Ralte pawhin thusawiin, "He hripui lak a Zoram him nan Serlui bial hi kan pawimawh tak zet a. Chumi atana ramri veng a duty zawng zawngte thawhrimna leh inpekna a ropui ka ti tak zet a. An zarah Zoram hi kan him ngei ang tih ka ring a ni. Tin, hmun hrang hranga Village Level Task Force duty zawng zawngte leh mipuite chungah lawmthu ka sawi bawk a ni," a ti.

Pu Lalruatkima, Minister hian ramri a khaw hrang hrang VLFT duty-te hnenah hian Rs. 5000/- theuh a pe a. Pu Lalrinsanga Ralte MLA hian ramri a VLFT riak lut a duty te hman tur Solar lamp 30, bakah silpaulin leh pawisa fai engemawzat a pe vek bawk.

Minister Pu Lalruatkima hi Pu Lalrinsanga Ralte, Serlui bialtu MLA, Vice Chairman Rubber & Allied Crops Development Board, Pu Benjamin Lalzama DRDA Project Director, Kolasib leh mi pawimawh ten an tawiawm a ni.