No.3253/2021-2022
Aizawl, 2nd December, 2021 : New Delhi a cham mek Rural Development Minister Pu Lalruatkima chuan vawiin khan sawrkar laipui (Government of India) hnuaia Ministry of Rural Development leh Ministry of Home Affairs hnuaia mi pawimawh hrang hrangte New Delhi-a an office-ah a hmu a. Mizoram Sawrkar hnuaia mamawh hrang hrangte a thlen a ni. Pu Lalruatkima hi Pu Lalrinsanga Ralte, MLA & Vice Chairman, Rubber & Allied Sector Development Board in a tawiawm a ni.

Minister Pu Lalruatkima hian Pu Nagendra Nath Sinha, Secretary, Ministry of Rural Development, Govt. of India leh Dr. Vivek Joshi, Secretary, Border Management Division, Ministry of Home Affairs, Govt. of India te chu an office chamber-ah a hmu a. He hunah hian Minister chuan Mizoram mamawh hrang hrangte thlenin, MGNREGS hnuaia Wages Sawrkar laipuiin a la release loh awmte chu kan hma lawk a hunpui lo thleng turah mipuiten an inhlawhna atanga an chanpual tur sum leh paite an hmuh a, krismas leh kumthar hlim taka an hman ve theihna turin Wages pek la hmabak leh 2nd Instalment pawh a rang lama Ministry in a release theihna tura theihtawp chhuah pui turin Secretary hi a ngen a. Secretary hian ngai pawimawhin a rang thei ang bera Minister in a thu thlen hi lo bawhzui sak a tiam a ni.

Secretary, Ministry of Rural Development, Govt. of India a hmu zawh hian Pu Ruatkima chuan Dr. Vivek Joshi, Secretary, Border Management Division, Ministry of Home Affairs hmu lehin Border Area Development Programme (BADP) chungchang a sawipui a. BADP kum 2021-2022 kalpuina tur sum pawh a rang lama release sak turin a ngen a ni. Kum 2020-2021 chhunga BADP sum la release loh 2nd Tranche Rs. 1228.95 Lakh chu a rang lama release sak turin a ngen bawk. Secretary hian a tul anga a lo bawhzui tur thu leh a rang thei ang bera 2nd Tranche hi rawn release an tum tur thu Minister hi a hrilh bawk a ni.

Rural Development Minister leh Secretary, Ministry of Rural Development, Govt. of te indawrna ah hian Secretary-in Mizoram Sawrkar abik takin Rural Development chu Scheme hrang hrang an kalpui dan ah titha a tih thu leh hmalakpui pawh phurawm a tih zia Minister hi a hrilh bawk a, Secretary hian theihtawp chhuaha Mizoramin a mamawh ang ang te a ranglama a lo bawhzui tur thu a hrilh bawk a ni.

Attachment

  • Loading attachment...