No.3252/2021-2022
Aizawl 2nd December, 2021: National Pollution Control Day 2021 pualin Mizoram Pollution Control Board (MPCB), Mizoram Envis Hub leh Champhai District Cycling Association te tangkawp chuan Swachhata Action Plan (SAP) 2021-2022 hnuaiah tukin dar 6 khan Cycle Rally, Champhaiah an nei.

He hun hmanpuitu Addl. DC Champhai Pu Henry C.Lalrawnkima, Adviser, Champhai District Cycling Association ni bawk chuan National Pollution Control Day puala Champhaia Cycle Rally buatsaih a ni thei chu lawmawm a tih thu a sawi a. National Pollution Control Day hman tan a nih dan tlangpui sawiin, December ni 2 leh 3, 1984-a Bhopal Union Carbide Plant atanga gas hlauhawm tak (Methyl Isocyanate) put chhuakin mi 20000 vel zet nunna a lak bakah mi tam tak hriselna a tih chhiat phah thu leh, chu mi hriat reng nan kum tin December ni 2 chu National Pollution Control Day atan India sawrkarin a ruat thu a sawi a. Kum 37 zet a liam tawh chung pawhin a bul hnaia chengte chuan an la tuar zel a, Bhopal leh a chhehvelah nau pian fel lo an tam em em reng a, boruak leh tui thianghlim dàn pawhin ngai a la awh hlei thei lo a, leilungin a tuar a, thlai thar chhuahah pawh chu gas zungzam chu a la awm zela hriat a ni, a ti.

Boruak thianghlim hip tur leh tui thianghlim in tur neih chu mitinte chanvo a nih thu leh chhehvel fai leh nuam, tawphnawk leh tenawm awm lohnaa tualchai chu mitinte chanvo a nih thu sawiin, hre reng chunga hmangaihna nei lo ang hrima kan chenna leh chhehvel kan suasama kan tihbawlhhlawh thin avang hian chenna tur hmun kan neih chhun hi chenna tlak lovah kan siam lui mek zel a ni, a ti a. Mithiamte chhuidanin khawvel pumah kum tin Mizoram mipui zawng zawng let 6 aia tam mah boruak bal/tha lo hip avanga an thih thu leh mi 10 zela mi 9 chuan boruak leh tui thianghlim duhkhawp an hmu thei tawh lo ni a an chhut thu sawiin, kan khawsak phung pawlawh lutuk avanga boruak leh tui kan tihbawlhhlawh chakziate, thing leh mau leh leilunga malsawmna awm ten an tawrh phahziate, a chhunga cheng mihringte leh nungcha ten a nghawng kan tawrh let mekzia te hi ngaihtuah chian a, kan harh chhuah a hun tak zet tawh a ni, a ti bawk.

Pu Henry C.Lalrawnkima chuan boruak chhiat chak dante, tui bawlhhlawhzia leh khawvel dam lohziate chu thuthmuna sawi mai lovin a chhe zel tur ven leh siamthat hna thawk turin a tak taka thawhchhuaha chetlak a ngaih takzet thu pawh sawiin, boruak chhe zel tur ven kawnga thawkchhuak Cyclist rualte chu theihtawp chhuah a hmakakpuiah a sawm a. Cycle khalha chet vel hi taksa leh rilru tan a hrisel mai a ni lo a, kan khawvel tan hian a hrisel takzet a, chu chu hriain MPCB pawhin keini rual hi thawhpui an chak tlat a ni, a ti a. Thalai rualte chu boruak, kan chenna leh avel tihbawlhhlawh thei hrang hrangte zirchianga midangte zirtir chhawng zel tur leh a chhe zel tur ven kawnga mawh la ngam turin a chah a. Nakin zela tu leh fate tana khawvel thianghlim leh hrisel tha tak hnutchhiah a pawimawh thu tarlangin, kalkhawmte chu khawvel nuam leh hrisel zawka kan awm zel theih nana thahnemngai taka thawk turin a chah nghal bawk a ni.

National Pollution Control Day pual Cycle Rally-ah hian Champhai District Cycling Association member 30 vel an tel thei a. A khuhhawnna hmun Champhai Vengsang Biakin kawn atanga kilometre 7 a thui Champhai Zotlang thleng an tlan a, Khankawnah kualin Kanan Veng an rawn lut leh a ni. Boruak thianghlim leh hrisel, bawlhhlawh leh boruak tichhe thei dangte venga fihlim tura inzirtirna T-Shirt leh lehkhaziak pamphlet an sem nghal bawk a ni.