No.3251/2021-2022 
Dated Aizawl, the 2nd December, 2021: Vawiin khan Pu Lalchamliana, Hon'ble Minister, Home, Taxation, DM& R, etc., chuan a bial chhung khua Bungtlangah Govt. Bungtlang High School-in kum 2021 HSLC Exam-a zaa za an hlawhtlin lawmnaah khuallian niin a hman puia; Bungtlang Higher Secondary School Building thar a hawng bawk.

Zirlai hlawhtlingte lawmpuina inkhawm, High School Classroom-a buatsaihah Pu Lalchamliana chuan, a tum nga nana Bungtlang High School in HSLC zaa za hlawhtlinna an chang leh ta chu chhuanawm a tih thu a sawi a. An hlawhtlinna erawh a bul tanna mai a la ni tih inhre turin a chah. Thufingin a bul tan that hi a zatve zo ang a ni a tihrualin, a tawp kharna tha hi mitin tan a pawimawh hle a. Vawiina pass tha tawklo te tan pawh zirna sang zawkah insiam that lehna hun tha tam tak a la awm tih hria ila, a tawp kharna tha tak neih ngei i tum ang u, a ti. Sawrkar in zirna a ngaih pawimawh thu sawiin; department danga hnaruakte hnawh khah an nih hleih theih loh laiin Education Department ah erawh chuan an nghet thei nghal chiah lo naa zirtirtu engemawzat lak thar an ni, a ti a. Zirna chu exam-a pass nan ringawta beih tur a nilova, mi puitling, mi hman tlak nih nana zir tur kan nih avangin school ah leh in lamah nasa taka kan beih a ngai a, tuna rim tak leh hrehawm hmasak pawisa lova lehkha zir hi nakina kan nawm sakna tur a ni tih i vawng reng ang u, tiin zirlai naupangte hi a fuih a ni. Minister hian distinction a pass zirlai 7 te hnenah Citation a hlan nghal a ni.

Khualzahawm Pi Zohmangaihi, DEO, Serchhip pawhin thusawina neiin, zirtirtu, zirlai naupang leh khawtlang mipuite inpekna leh thawh hona tha vanga hlawhtling nia a hriat thusawiin zirlai naupangte lawmpuina a hlan a ni.

Principal, Pu V. Suresh chuan report pein kumin HSLC exam ah khan zirlai naupang 42 ten exam in tum khata HSLC exam beitu an ngah ber tum a la ni a, an za vaiin an pass a, kumin hi Bungtlang High School din anih ata zaa za an hlawhtlin tum ngana a ni. Kumina pass zinga 7 te chu distinction ni in, zirlai 20 te 1st division ah an pass a, 2nd division ah 12 leh 3rd division ah 3 an pass bawk. Mizoramah 100% passed awmna school zingah 16 na an ni a, sawrkar school zaa za pass zingah pakhatna an nih thu Principal chuan a tarlang bawk. Tin, an school chanchina tum khata hmeichhe zirlai hlawhtlin tam ber tum niin zirlai 25 an pass a, distinction-a pass an tam ber kum a ni bawk a ni. An hlawhtlinna lawmpui nan Pu Lalchamliana hian MLA fund atangin Rs. 34,000 a lo pe tawh a, Serchhip Bawrhsap Pu Kumar Abhishek, IAS chuan lawmpuina a hlan bawk a ni. Tunah hian Headmaster, zirtirtu 4 leh IVth Grade 2 an thawk mek a ni.

Bungtlang High School hi kum 1968 ah mi tlawmngaiten an din tan niin, 1979 ah Deficit niin kum 1991 ah Provincialised a ni a. Chuta tang chuan Government Bungtlang High School tih a ni ta a ni. Kum 2015 atang khan an school hi HSLC leh HSSLC exam centre ah hman a ni bawk.

Zirlai hlawhtlingte lawmpuina hman zawh hian khawtlang mipuite thawhkhawma an sak Bungtlang Higher Secondary School building thar chu Home Minister hian hawnna a nei leh a.

He hunah hian Pu Lalchamliana chuan, Bungtlangin Higher Secondary School hmun tha tak mai an lo nei chu lawmawm a tih thu a sawi a. Khawvel thang chho zelah zirna in sang zawk sakte pawh an la mamawh theih tih inhriaa, hmathlir thui tak nei turin a chah a ni. Thawhrimna zawng zawngah hlawkna a awm tih Pathian thuah kan hmu a, class room a kan zir bakah nitin in lamah darkar 4 tal kan zir peih anih chuan engtikah mah in hlawhchham lovang tiin zirlaite a fuih a. Tun atangin in nih tumah chian ula, zirna sang zawkte tha zawka pass ngei tum chho zel ang che u, tiin a chah a ni.

Bungtlang HSS hi kum 2010 a din niin member 18 awmna Managing Board in a enkawla, an chairman chu Bungtlang VCP a ni. An din tirh atanga vawiin thlengin zirlai naupang 130 an pass chhuak tawh a ni. Vawiina Home Minister in a hawn an building thar hi a dung 42 ft leh a vang 18 ft niin Office building te nen Rs. 675,000 senga khawtlang mipuiten an sak a ni. Principal Pu C. Remsanga, Vice Principal Lalrinfela Sailo bakah zirtirtu pali leh fourth grade pakhat ten an enkawl a, an din tirh ata zirlai zaa za an hlawhtlin hi tum thum an nei tawh a, kumin HSSLC exam ah pawh zirlai zawng zawng an pass a ni.

High School zirlai tithate lawmpuina leh Higher Secondary School building thar hawnna inkhawm hi Pu R. Lallawmzuala, VCP, Bungtlang chuan a kaihruai ve ve a ni.