Tourism Minister Pu S.Hiato chuan nimin khan Thenzawl Community Hall-ah, Mizoram Sawrkar-a Tourism Department leh Centre for Rural Development & Research (CRDR), Aizawl te tangkawpin Thenzawl leh a chhehvel khua te tan ni 5 chhung (9-13 July, 2012) awh tur ‘Rural Tourism Awareness Campaign & Training Camp’ an buatsaih chu khuallian niin a hawng. He programme hian thingtlang khaw mipui ten khualzin hip thei tura an inbuatsaih theih nan kawng hrang hrangah zirtirna pek bakah khualzinte lo dawnsawn dan chipchiar taka inhrilhhriatna programme hi Mizoram-ah a vawikhatna atan duan a ni. Hawnna inkhawmah hian Parliamentary Secretary Pu H. Zothangliana bakah Secretary Tourism Department Pi B Sairengpuii leh Tourism Director Pu Vabeiha Hlychho te pawh an tel a ni.

Tourism Minister Pu S.Hiato chuan Sawrkar in Rural Tourism bultan nan a thlan chu Thenzawl tan mel lung pawimawh tak a ni tiin puantah kawnga Mizoram a sulsutu an nih avangte, a khaw mipui thawhrimna leh taimakna ngaituah in leh Thenzawl leh a chheh vel khua ten Tourism lamah potential sang tak an neih te ngaituah in, thlan a thu a sawi a. Mizoram ah thil hmuh tur tam loh mahse sik leh sa nuam tak mai kan neih te, boruak ralmuan leh muanawm tak kan neih te, ramngaw kan neih te, a ram leilung awm dan te leh Mizo ze mawi tha kan neih te hi khualzin hip thei tur thil tha leh hlu tak mai a ni a ti a. Minister chuan Tourism hi Sawrkar chauhin a hlawkpui lova, inbuatsaihna changtlung tak, inzirtirna tha pek leh Mizoram chanchin thehdarh that chuan a chhawr ber tur leh a hlawkpui ber tur zawk chu mipui mimir an ni, a ti. Mipuiten Tourism an chhawr zawk theih nan Sawrkarin ngaihtuahna a seng reng a, chumi atan chuan Rural Tourism hi Mizoram khaw dangah te pawh kalpui a nih tur thu a sawi a. Thenzawl-a Sawrkarin hmalakna hrang hrang a kalpui mek te leh hmasawnna hmachhawp thenkhatte chu a thusawiah hian Minister hian a tarlang bawk a ni.

Parliamentary Secretary Pu H. Zothangliana chuan Rural Tourism bultanna hmun an nih dawn vangin Thenzawl khaw mipuite chuan mawhphurna sang tak an nei thu a sawi a. An tihthat leh that lohin Mizoram-a Rural Tourism kal zel dan tur thui tak a hril thei dawn avangin training tura thlante chu tih tak zeta, taimakna leh inpumpekna nen zir turin a chah. Pu H. Zothangliana chuan Tourism hi Sawrkar tana sum hnar tha tak, mipui pawhin an tangkai pui theih tur nia a hriat avangin Chief Minister kaihruaina hnuaiah Mizoram Tourism Development Board (MTDB) chu din fel a nih tawh thu a sawilang bawk a ni.

Programme kaihruaitu Pi B Sairengpuii chuan Mizoram Tourism Policy peih fel tep a nih thu leh Tourism tun aia chak zawka kalpui anih theih nan leh mipui huapa hlawkpui zawka kalpui dan ngaihtuah turin Consultant rawih tum anih thu a sawi a ni. MTDB Member Pu Sangzela Tlau chuan Awareness leh Training Camp kalpui dan tur chipchiar takin a sawi bakah Tourism industry pawimawhna leh nghawng a neih theih dante a tarlang tel a ni.

Awareness Campaign & Training Camp chung hian Thenzawl khaw mipuite tlangkawmna ‘Participatory Rural Appraisal’ neih a ni anga; Handloom Product & Marketing chungchang te; ei leh in thianghlim siam dan leh mikhual dawnsawn dan ‘Hospitality, Food and Catering Management’ chungchang te; Tour Guide chungchang te; khualzin biak thiam dan tur ‘Basic Language Skills’ chungchangte, Basic Photography Workshop leh Entrepreneurship & Capacity Development chungchangah te mithiam ten Thenzawl, Hmuifang leh Sialsuk atanga mi thlanchhuah te hnenah training an pe ang.

Thenzawl hi Mizoram-a puantahna hmunpui pawimawh tak a ni a, thla tin puantah atangin nuai 35 vel an hai lut thin a chhut a ni a. Thenzawl hi Mizoram-a khawthleng nei tha ber niin a bul hnaiah hian Lungrang Tlang, Vantawng Khawhthla, Tuirihiau, Bengkhuaia thlan leh Tualvungi thlan te a awm a ni.

Attachment

  • Loading attachment...