Labour, Employment and Industrial Training (LE&IT) Minister Pu Lalrinmawia Ralte chuan vawiin khan Hlimen leh Melthum quarry-a hnathawktu te hman tur safety helmet a sem.

Minister chuan Mizoram Building and other Construction Workers Welfare Board kaltlangin chetsual mai theihna hmuna thawkte hamthatna tur sorkar chuan a ngaihtuahsak a, safety helmet pawh hi lung in a tlak mai hlauhawmna hmuna thawk quarry workers te him zawkna ngaihtuahin a sem a ni, a ti. Construction workers te, quarry a thawkte leh chetsual palh theihna hmuna thawk Mizoramah tam tak an awm laiin MB & OC Welfare Board a inziak lut tun dinhmunah mi 25,000 vel chauh an la awm a. Hamthatna chi hrang hrang sorkarin a siam sak dawng thei turin he Board ah hian inziaklut ngei turin a sawm a ni. Pu Lalrinmawia Ralte chuan quarry a lung la thin te leh rawra chhu a eizawngte chawlh hahdamna tur chawlhbuk sak tum a nih thu a sawi bawk.

MB & OC Welfare Board hnuaiah hian Lungrem, Leirawhchan siam, Thirchher, Rawnghnawih, Fitter, Plumber, Thingzaina, Balu leh Lungla, Quarry a Lungla leh hnathawk dang, Electrician, Cement hna leh thir siama inhlawhfa, kawng laia inhlawh, Chinai siamna a inhlawh, Thirchara inhlawh te a huam a. India khua leh tui dik tak kum 18-60 inkar tan registration fee Rs.25 leh thlatin a tih nun nan Rs.10 pe in a inziahluh theih a ni. Thihna leh vanduaina chungchangah te, damloh leh chetsual tawh palhah te leh hnathawhna hmuna chetsual avanga ramtuileilo awm te tan chhawmdawlna sum a pe thin a. Hei bakah hian pung tlemte a loan lak dan te leh member hmeichhia te tan bika siam hamthatna siamsak an nih bakah an fate zirna senso thlengin sum engemawzat a tumsak thin.

Hlimen leh Melthum-a quarry hnathawktute hnenah Safety Helmet 226 leh chhiatrupna a lo thlen thula mipuite tanpui tura inpe Central YMA hnuaia Disaster volunteer-te hman tur Helmet 30 pek an ni.