Vawiin chawhma Dar 11:00 khan Khawlailung VC Hall ah SAGY Programme hnuaia Lok Sabha MP Pu CL Ruala'n Model Village a siam tura a thlan Khawlailung khaw tihhmasawnna atana hmalakna kawng pakhat atan Fisheries Department, Serchhip chuan Khawlailung khuaa Sangha khawitu chhungkaw 40 te tan hlawk zawk leh awmze nei zawka sangha khawi dan zirtirna "Training" a buatsaih.

He Training Programme hi hun hnih a then niin chawhma lamah Training hawnna inkhawm buatsaih a ni a, he hun hi Pi Zonuntluangi DFDO, Serchhip in kaihruaiin Training huaihawt anih chhante a sawifiah a, Khawlailung khua chu Lok Sabha MP in duhsak taka SAGY hnuaia a thlang chu an vanneih thu sawiin, chu vanneihna chu hmang tangkai a, tihtak zetleh hlawhtlin ngei tuma sangha khawi kawnga hmala turin a fuih.

Sangha chu sa hrisel tak anih avangin sum hailuhna mai nilovin, Model Village an nih ngei theihna tura an khaw mipuite hriselna tur a sangha ei tam tir thei tura sangha tam zawk tharchhuak turin a fuih a, hei bakah hian mizote hian kan mamawh khawp sangha kan la tharchhuah theih loh avangin kan sangha ei tam ber te chu Mizoram pawn atanga kan lakluh ala ngai ani tiin sangha chu eizawnna tling ani tih hria a hlawk taka thar chhuak thei ngei tura tan la turin a fuih bawk.

He Trainingah hian Fisheries Department lama mithiamten sangha dil siam leh dil enkawl dan te, sangha chi hrang hrang khawi pawlh dan bakah sangha tui enkawl dan (note siamdan) te leh buh leh ran dang nena sangha khawi kawp dante a lema entirin an zirtir a, zawhna leh chhanna hun benglut leh hlawkthlak tak hman a ni bawk.

Fisheries Department, Serchhip hian kar kal ta zirtawpni (October ni 16) khan Rajya Sabha MP Pu Ronald Sapa Tlau adopted Village Chhiatlangah hetiang Training hi an lo buatsaih tawh bawk a ni.