Khawvel pum huapa Iodine tlakchham vanga natna chungchanga inzirtir leh inhrilhhriatna ni atana ruat October ni 21 chu vawiin khan Champhai District-ah, CMO Office Chamber-ah pawh he ni pual hian hun hman a ni.

Champhaia Observation on Global Iodine Deficiency Disorders (IDD) Prevention Day-ah hian Dr. C Zirliana, CMO Champhai chuan thusawiin, Iodine tlakchham avanga natna thleng thei chi hrang hrang a tarlang a, nu naupaiin Iodine a tlakchham avangin a naute paiin hriatreng theihna an hloh thin a, lehkhazir lamah leh finna kawng chi hrang hrangah a hnufum phah thin a ni a ti a. India Sorkar pawhin a ngai pawimawh a, miin a thlawna Iodine a ei theih nan mitin mamawh chi ah telh a ni a, chu chuan Iodine tlakchhamna a ti hniam ani a ti a. Iodine hi chi ah telh ni tawh mahse, kan chi bur taka chhin loh chuan Iodine a thamral thin avangin chi bur te phui taka chhin thin a ngai a ni a ti a. Chi ah hian Iodine kan mamawh tawk Iodine a awm em tih hi Sub Centre ah test na a awm a, kan taksa mamawh tawk Iodine kan ei thin tur a ni a ti bawk.

Thu sawitu dang Dr R Lallianmawia, SMO chuan IDD in a tum ber chu Iodine tlakchham vanga harsatna thleng thei tihreh a ni, a ti a. Nu in Iodine a tlakchham chuan nautein a tuar a, naupangin harsatna tam tak a tawk thin thu a sawi a. Mizoramah pawh chi ah Iodine telh a nih avangin awrpuar hmuh tur an awm mang tawh lo a, Iodine tlakchham avanga harsatna kan tawh lohna turin tan kan lak angai a ni a ti bawk.

Mihring hi kan pian tirh atanga thla 6 inkar chu migringin nitin Iodine 110 micro gram kan mamawh a, chu chu a nu atanga a dawn a ngai a. Nausen thla 7-12 in nitin 130 macrogram mamawh a, Kum 1-8 inkarin nitin 90 macrogram an mamawh a, Kum 9-13 inkarin 120 macrogram an mamawh a, kum 14-18 inkarin 150 Macrogram an mamawh a, Puitlingin nitin 150 macrogram an mamawh a, Nu naupaiin nitin 220 macrogram mamawhin Naupawmin mamawh tam berin nitin 290 macrogram an mamawh a ni.