AH& Vety Department Serchhip chuan vawiin chawhma dar 10:30 atang khan Serchhipa Bawng vulhtute tan Bawng vulh dan leh enkawl dan tur zirtirna "Dairy Farmers' Training" Serchhip P&E Veng YMA Hall-ah an buatsaih a, Serchhip leh a chhehvela Bawngvulh chhungkaw 60 an Training hi Dr. Lalnghinglova, District AH & Vety Officer Serchhip chuan kaihruaiin Training buatsaih anih chhante a sawi a, tun hma lam chuan ran vulhtute hnena zirtirna pek hi mipui nawlpuiin tul kan ti lo thin kha a ni a, amaherawhchu tunlai thiamna sang zelah mahni duh thua ran enkawlna damdawite hmang ve mai lovin mithiamte duhdan anga kal hi a tul ziate hriat chhoh zel a ni a. Ran vulhtu hlawhtling ni tur chuan ruahmanna tha neih a tul a, eng harsatna pawh tawk palh ila chi ai mai lova lo in buatsaih lawk a tul a, chumi atan chuan Training neih hi a tul hle a ni a ti.

Dr. Lalnghinglova chuan mithiam ten ran vulh dan tha zawk leh a chi tha zawk siam tumin hma an la reng a, an thil hmuh chhuah leh zir chhuahte a in ang vek lem lova, kan rama hman tura kan her rem a tul changte a awm thin a, chuvang chuan Department-a thawktute leh ran vulhtute’n thawh hona tha tak kan neih hi a tul a ni a ti a, ran vulhtute thinlungah tunlai thiamna leh hriatna thar ber berte tuh a, hmasawnna neihtir hi kan tum ber leh training kan koh chhan a ni ani a ti bawk.

Training-ah hian Resource Persons atan Dr. R. Lalmakthanga, Fodder Development Officer, Serchhip, Dr. Lalmuanpuia Samte, Veterinary Officer, Thenzawl leh Dr. Lalsanglien Ralsun, Veterinary Officer, Serchhip te hman an ni a, an ni hian ran in sak dan tur leh a hmun thlan dan tur te, a chaw chin leh pek dante, hlawhtling taka ran an vulh theih dan turte zirtirna an pe a, zawhna leh chhanna hunte siam niin sawi hona hun tha tak an hmang a ni.