Champhai District Local Administration Department bultumin Champhai District chhunga Village Council-te sum enkawl dan te, khawtlang in enkawlna chungchanga Village Council thuneihna chungchangte, Gram-Sabha enkawl te, Sub-Village (khawper) hmui dante leh Ran enkawl leh khuah khirh dan bakah kangmei laka ram venhim kawnga Village Council mawhphurhna chungchang zirtirna vawiin khan Champhai Zotlang Mangkhaia Hall-ah neih a ni.

He hun hi Champhai DLAO Pi V. Lalmuanpuii'n kaihruaiin, Village Council in kaihhruaina dan thar Act chu siamfel ni tawh mahse Rules siam fel ala nih loh vanga Ran chhiah pawh dan hlui anga kalpui rih anih tur thu a tarlan pahin kangmei laka ram venhim kawnga VC te mawhphurhna a tarlan bakah Champhai District chhunga Village Council dinhmun tlangpui tarlanna a nei bawk.

Vawiin hunah hian Village Council ten khawtlang tih hmasawnna tura sum an hman dan leh vawn dan chungchanga fimkhur leh uluk a pawimawh dan zirtirna Champhai District Treasury Officer Pi Lalfakawmi'n a pe a. State Veterinary Officer Dr. Lalramdintluanga hnen atangin Khawtlang thianghlimna leh hriselna atana ran vulh leh enkawl dante, ran thi sawngbawl dan leh sathianghlim ei pawimawhna chungchang ngaihthlak ni a. Village Council in Gram-Sabha bungrua, sum leh pai an enkawl dan tur leh Sub-Village (khawper) an hmui dan tura kaihhruainate Pu Vanlalhruaia'n a zirtir bawk.

Village Council-te mawhphurhna peng hrang hrang zirtirna pek anih hnu hian zawhna leh chhanna hun hman anih bakah khawtlang enkawlna kawnga koritu zawka Village Council ten ke an pen theihna tura rawtna hrang hrang tarlan anih bakah sawihona hun hman a ni a.

He hunah hian Champhai District chhung Village Council 108 atangin VC tin aiawh 3 theuh an kal khawm a ni.