Vawiin khan VC Hall Chhiahtlangah SAGY Programme hnuaia  Rajya Sabha MP Pu Ronald Sapa Tlau-in Model Village siam tura a thlan Chhiahtlang khaw tihhmasawnna atana hmalakna kawng pakhat atan Serchhip  Fisheries Department chuan Chhiahtlang khuaa Sangha khawitu thlanchhuah bik chhungkaw 40 te tan Training a buatsaih.

He Training Programme  hi chawhma lamah Pi Zonuntluangi DFDO,Serchhip in kaihruaiin Training huaihawt anih chhante a sawifiah a, sangha khawi chu sum lakluhna tur mai nilova, sa hrisel anih avanga a tangkaina te sawiin Model Village ni thei tura pawimawh mipuite hriselna atana Sangha tam zawk Chhiatlang mipuiten  an ei theihna tura tan la turin  Sangha khawitu kalkhawmte chu a fuih a, Dil a Sangha khawi mai bakah, Chhiahtlang khawtlang leh Branch YMA hrang hrang ten  Lui dung nungchate an humhalhna kawnga an hmalakna chu fakin, nasa leh zuala tan la turin a fuih bawk.

He Trainingah hian Fisheries Department lama mithiamten Sangha Dil siam leh Dil enkawl dan te, Sangha chi hrang hrang  khawi pawlh dan mai bakah  Sangha Tui enkawl  dan (note siamdan) te leh  Buh leh Ran dang nena Sangha khawi kawp dante  a lema entirin an zirtir ani. Fisheries Department, Serchhip hian Kumin June 2015 khan SAGY  hnuaia hmalakna ah Lui dung a Nungchate  humhalhna kawnga hma an lakna avanga lawmthu sawi nan heng Chhiahtlang khua a YMA Branch 3 - Chandmary Br.YMA, Zotuithiang Br.YMA leh Hmarveng Br YMA  te hnenah Rs 40000 leh Citation an lo pe tawh a ni.