Vawiin ah khan Mizoram Governor Lt.Gen(Rtd.) Nirbhay Sharma leh a nupui Pi Jyotsna Sharma te chuan Aizawl khawpui chhim lam a kohhran Office te, tlawmngai pawl hmunpui leh School thenkhat te a tlawh.

St.Paul’s Higher Secondary School, Mary Mount School leh Christ The King, Cathedral, Kulikawn te a tlawh hnu in Synod Office, Mission Veng, CYMA Office leh UPC(NEI) Biakin, Tuikhuah Tlang te a tlawh nghal a ni.

St. Pauls School leh Mary Mount School a tlawh na ah Governor Lt.Gen(Rtd.) Nirbhay Sharma Mizo sikul naupang te hian Mizoram hmabak an ni mai lova, India hmabak an ni tih an inhriat angai a ni a ti. Zitirtu ten lehkha zir tir piah lamah a tam thei ang ber infiamna leh activity dang te naupang ten an neih theih nan an hun thawl tlem leh chawlh hun te hmang tangkai thin se a duh thu a sawi a. Sikul naupang te chu an sikul atanga chhuak mi hlawhtling te dinhmun an hriat a ngai a, chu chuan nasa takin phurna a pe thei ang tiin Sikul leh alumni association inlaichin pawimawhna te a tarlang.

Mizoram Presbyterian Kohhran hruaitute chuan Synod Office tlawhtu Governor pualin J.M. Lloyd Hall, Synod Office ah Official programme tawi a lo buatsaih a. Rev.H.Lalrinmawia, Synod Moderator in programme kaihruai a, Dr. Robert S. Halliday, Superintendant in Mizoram Presbyterian Kohhran nihphung , Sawrkar tha nei tura hmalakna leh tanpui ngaite tanna a rawngbawlna hrang hrang chungchang report tawi pei in Rev. Lalramliana Pachuau, Executive secretary in Synod office aiawh in lawmthu a sawi thung. JM Lloyd Hall a thusawitu Governor chuan Mizoram chuan Synod leh kohhran hrang hrang hruaitu rintlak tak tak a nei chu a vanneih pui hle a ni a ti a, Mizoram hmasawnna atan nasa takin thil an ti thei a ni a ti. Rinawmna leh Kristian zirtirna tha tak tak mizo mipui ten an nunpui avangin Mizoram chuan ram hmasawnna atana pawimawh ber remna leh muanna duhawm tak a nei a. Lehkha thiam tamna, ram leilung hauhsakna in a thuam, ram mawi tak chhunga mipui tlemte hian hmasawnna ah midang te entawn tlak khawp in reilote chhungin thil an ti thei tih a chiang reng a. He hmasawnna a a lo thlen ran zawk nan Mizo thalai te vak chhuak tam se, midang te pawh rilru inhawng zawka lo dawngsawng bawkin Hindi, English leh hnam dang tawng thiam hmasak ber angai ang a ti a. “Mizoramah hmasawnna tam tak rawn lut mup mup tur a hmuh theih tawn tawh a, he hmasawnna dawl thei leh chhawr thei tur hian Mizo thalai te kan in peih em,entir nan relkawng in a rawn ken tel hna tam tak kan thawk thei em tih pawh kan in zawh a ngai’, a ti.

CYMA President Pu Lalbiakzuala, GS Pu Vanlalruata leh CYMA hruaitu ten an Headquater Office, Tuikhuahtlang ah Governor chu lo dawng sawng in Mizoram Governor zingah a vawikhatna atan an office rawn tlawhtu an hmu chu lawmawm an tih thu an lo hrilh a. SRS hmalakna leh thawhrimna te lo hrilh in an office chhung an fan kual pui a. Mizo thalai te ruihlo laka venhim hna an theih anga nasa in an kalpui bakah Mizo thalai ten mahni kutke an din theihna tur kawng kawhhmuh chu YMA in tunhma atang in hna pawimawh ber pakhat ah an nei tih an sawi a. CYMA General Conference, Bairabi a nghah tur ah pawh skill development in hmun pawimawh tak a luah dawn tih Governor hi an lo hrilh a ni. Governor chuan YMA leh an hmalakna chu ropui a tih thu sawiin Mizoram hmasawnna atan sawrkar thlawp zel turin a sawm a. Mizoram in a thil neih hlut ber leh a chakna hnar chu social service a ni tih kohhran leh tlawmngai pawl hrang hrang te hian a ti chiang a ni a ti. YMA hmalakna te a thlawp tlat thu sawiin an mamawh hun apiangah an tan Raj Bhavan a in hawn tur thu a sawi a ni. An in kawm zel na ah CYMA hotute chuan loan pe chhuak tha duh lo Commercial Banks chungchangah hmalak pui tura an ngenna pawh a rang lam a lo enfiah a tiam a ni.

Governor hi a Secretary Pu Rodney Ralte leh Aizawl Bawrhsap Dr.Franklin Laltinkhuma leh official ten an tawiawm a . Governor hian thawhtan leh thawhleh khian Aizawl khawpui hmun pawimawh thenkhat te pawh a tlawh chhunzawm leh ang.