Vawiin nileng khan NLUP Conference Hall-ah Urban Development & Poverty Alleviation (UD&PA) Department buatsaihin Smart City Mission chungchanga inrawnkhawmna (Public Consultation) neih a ni. Consultation Meeting-ah hi Pu Zorammuana, Director UD&PA chuan a kaihruai a. Dr. C. Vanlalramsanga, Secretary UD&PA hnen atangin Smart City chungchang sawifiahna ngaihthlak a ni a. Pu Andrew Lalhruaia, Deputy Director chuan Powerpoint Presentation hmangin Smart City awmzia, kalphung leh hmalak an tum dan tlangpui a sawifiah a ni.

UD&PA Secretary Pu C.Vanlalramsanga chuan Aizawl khawpui hi Smart City a lo nih theihnana ruahmanna siam kawngah sawrkar laipuiin a chhunga cheng mipuite duhdan a ngaih pawimawh em avangin mipui mimir aiawh zo tura ngaih tlawmngai pawl hrang hrang aiawhte, mi puitling leh rawn tlak nia ngaihte he meeting-a tel tur hian koh an ni, a ti a. Aizawl khawpui hi a kal ngaia kaltira, thlahthlam mai chuan a tuartu tur chu a chhunga chengte bawk an nih hriain hma kan sawn theihna turin uluk lehzuala ngaihtuahna sen a tul a ni, a ti.

Smart City Mission kaltlang hian kum 2015-2020, kum 5 chhungin India rama khawpui thlan bikah mipuite tana nitin khawsak awlsamna siam sak turin vantlang mamawh chi hrang hrang changkang zawka thawmthat tum a ni a. Heng thil tumte tihhlawhtling tur hian mipui ngaihdan la a mipui mamawh, Smart Solution chi hrang hrang - e-governance, traffic management, bawlhhlawh sawngbawl dan mumal, kawlphetha leh tui supply mumal tak leh skill development lam ngaihtuahsak tum a ni.

Smart City hmalakna tura thlanchhuah khawpui 100 zingah Aizawl hi tel ve in, inbuatsaihna hrang hrang atana bul tan nan sawrkar laipui chuan cheng nuai 200 a rawn release tawh nghe nghe a ni. Central sawrkar duh angin, UD&PA dept hian High Powered Steering Committee a din tawh a, school naupang tan leh a duh apiang tan Essay inziahsiak a huaihawt tawh bawk a, UD&PA Minister Pu Zodintluanga hovin thuthar thehdarhtute kawmna neih a lo ni tawh bawk a ni.

Sawihona hun hi chawhma leh chawhnuah neih a ni a. Then khatna hi Pu Vanlalmawia, Joint Secy UD&PA chuan a kaihruai a. Then hnihna hi Pu HVL Zarzoenga, Joint Director UD&PA chuan a kaihruai thung.

Consultation meeting-ah hian tlawmngai pawl hrang hrang aiawhte bakah prominent citizen leh official engemawzat an tel.