Vawiin chawhnu dar 1:00 khan Sansaad Adarsh Gram Yojana (SAGY) hnuaia Lok Sabha MP Pu CL Ruala’n- Model Village atana siam tura a thlan, Khawlailung khaw Village Development Plan tihhlawhtlinna pakhat atan Khawlailung khuaa sawrkar enkawl Primary School-a zirlai nu leh pate pualin Zirlaibu thar chungchanga inzirtirna hun Khawlailung Primary School I ah hman a ni.

Resource Person Pu H. Lalhruaitluanga, Lecturer SCERT chuan zirlaibu thar hman a nih dan sawiin, Mizoram sawrkar chuan kum 2015–2016 Academic Session atangin Mizorama School zawng zawng, Pawl 1 atanga Pawl IV ah NCERT zirlaibu hman turin a aruahmana. He ruahmanna hi Elementary Education-a thu neitu SCERT chuan a tul anga hma lain zirlaibu thar hman a lo ni ta a ni, a ti.

Zirlaibu thar hman a nih thin nachhan te sawifiahin, Zirlaibu thar hi hman satliah a ni mai lova, hun in her zel mila hmasawnna kan neih theih nan, mithiam ten ngaihtuahna seng chunga an buatsaih a nih thu a sawi. Tun hma lama zirlaibu kan hman thinah chuan naupangte tana zir nuam lam ngaihtuah lovin, zirtirtute tana hman awlsam tura siam a ni thin a, naupang ten zirlaibu an nghah lutuk a, an zir seng lova, an hre seng lova chu chuan lehkha an zir zelna turah a tih phur loh thin avangin NCERT buatsaih zirlaibute chu lehlina, a tul anga Mizote mil tura tih danglam niin Mizo medium leh English mediumah zirlaibu inang tura buatsaih a ni ta a ni a ti. Zirlaibu thar hian naupang a ngaipawimawha, nuam ti taka an zir theih tura buatsaih a ni a, naupangte hmasawnna tur atana tih turte pawh tam zawka dah a nih thu a sawi a ni.

Vawiin inkhawm hi Pu Lalrammawia, Principal, DIET, Serchhip chuan a kaihruai a, Khawlailung Primary School hrang hranga zirlai nu leh pate leh zirtirtute an tel tha hle a ni.