Rampum chhiarpui Census 2011 leh Socio Economic& Caste Census(SECC) hun laia Lunglei District chhunga Charge Officer leh Enumerator-a ruatte chu vawiin khan Saikuti Hall, Lunglei-ah National Population Register(NPR) Update-na tur Training neihpui a ni a, Lunglei DC Pu Ashish Madhaorao More chuan Training hi a hawng a ni.

Training hawnna inkhawm Lunglei SDC Pi Carolyn LB Khiangte kaihhruaiah Lunglei Bawrhsap Pu Ashish More chuan National Population Register rual hian Aaadhar Number ziah luh tur a nih dawn avangin Charge Officer leh Enumerator zawng zawngten training hi ngai pawimawh turin a chah a. District chhunga mi chengte dinhmun enfiahna a ni dawn a, NPR database thar an siam hun ah chuan mitthi tawh te, insawn/pem tawh te bakah khawchhunga awm thar emaw in luah thar emaw an awm a nih chuan ziah luh vek tur a ni tih a hrilh a. Mawhphurhna sang tak an kovah nghah a nih dawn avangin an hnathawh danah fimkhur leh uluk turin a chah.

Vawiina Charge Officer leh Enumerator Training-ah hian Hnahthial SDO(C) Pu Kannan Gopinathan leh Tlabung SDO(C) Pu Rolungmuana ten NPR thar siamdan chungchangah thil pawimawh hriat tur hrang hrang an hrilhfiah a ni.