Vawiin khan Lunglei District Disaster Management Authority buatsaihin, DC Conference Hall-ah Disaster Management Team te tan training neih a ni a, training hi Lunglei Addl. DC Pu Rothuama'n a hawng.

Training hawnnah inkhawm Pu Lalhmachhuana, MCS, Nodal Officer, DMR kaihhruaiah Pu Rothuama chuan thu sawiin 'disaster' hrilhfiahnaah chuan chhiatrupna hi a lian leh a te ah thliar a ni a, Mizoram-ah erawh chuan thliar hrang lovin 'natural calamity' ah dah vek a ni, a ti. Chhiatna a lo thlen hian hmachhawn thiam a ngai a, SDRF leh Adventure Club hrang hrang ten kan hmanrua neih ang nen tanrual a ngai a. Chhiatna a lo thlen hian Mizote chu tlawmngai hnam kan nih angin kan pung hluai thin a, hei hi a that loh chang a awm a, mumal deuha hmalak kan thiam loh chuan chhiatna a thlen belh thei a ni a ti. Sawrkarin mithiam training a pek te hi mipuite hian ngaichang thiam ila, ruahmanna fel tak nen State Disaster Response Force leh Adventure Club hrang hrang te thu zawm thiam a pawimawh hle a ni a ti bawk. Kan hmanraw neih te hi uluk taka vawngin a hun taka hman theih turin inpuah chhah theuh turin a duhthu a sawi. SDRF leh Adventure Club te hian an thil thiam te midang te zirtir turin a chah bawk.

Pu Lungduhsanga, Dist. Organiser, DMR chuan 'Role & Duties of Search & Rescue Team' tih chung chang a zirtir a; Pu F. Lalremruata S.I. 2nd Bn. MAP SDRF chuan Equipment hmandan demonstration nen entirna a nei bawk a ni. Chhiatrupna a thlenin District Emergency Operation Centre Tel. No. 2323635/Mb. No. 8730038157 leh Toll Free 1077 ah biak tur a ni.