Vawiin tlai hian Lawngtlai Bawrhsap Pu J. Hmingthanmawia chuan DC Conference Hall ah All Commercial Vehicle Joint Action Committee hruaitute chu meeting neih puiin an thil phut chungchanga sawrkar hmalakna hrang hrang te a hrilhfiah a, inremna siam puiin kawngpui dan mek chu tihtawp nghal a ni.

Bawrhsap chuan, Lawngtlai to Parva road chu Meeting hmasaa sawi tawh angin a enkawltu 71 Road Construction Company ten an thawk nghal a, an hnathawh hi JAC te ngei pawhin a hmunah enin lungawi thlak an tih thu an sawi a ni. Lawngtlai to Kawlchaw kawngpuia kawngchhe zual lai; JAC ten siamthat thuai tura an ngen pawh siam tawh a ni a, Aeropagy leh FCI Godown inkar kawng pawh a enkawltuten thawk nghalin vawiin thlengin hna an la thawk a ni, a ti. Khawchhunga Telephone, Cable TV leh Electric hrui hniam zualte pawh tunah hian VC te nen thenfai hna thawh mai theih a ni tawh a. Vehicle Picketing avang chauhva thawh rih loh a nih avangin Picketing hlih a nih hunah thawh mai tur a ni, a ti bawk.

Lunglei to Lawngtlai National Highway pawh tunah thawh mek a ni a, Lunglei lam hnaih kawngchhe bik lai Vawngzawl phei chu lung phaha chil mam deuh vek a nih tawh thu tarlangin, Lawngtlai District chhung bik pawh thawh mek a nih thu Pu J. Hmingthanmawia hian a sawi bawk. Chutihlaiin Lawngtlai to Zero Point National Highway erawh chu a thawktu tur zawnna tender koh mek a nih avangin Black topping bik tak chu tlema nghah deuh a ngaih tur thu a tarlang. Chak taka bawhzui a nih theih nan a changtu Chief Engineer te a ngen tur thu a sawi bawk a ni.

All Commercial Vehicle Joint Action Committee hruaitute chuan an thil phutte bawhzui a nih avanga lawmthu an sawi rualin heng hnathawhte hi chak taka chhunzawm zel a nih theih nan inremna, ziak ngeia dah an phut a. An phut ang hian JAC te leh helai bial enkawltu PWD Division hrang hrang hotute chuan inremna an ziak a ni.

He Meeting ah hian Lawngtlai Superintendent of Police Pu Lalsanglura, PWD Highway Division VI EE Pu Pazawna, PWD MMPD leh PWD Lawngtlai Division hotute leh JAC hruaitute bakah Central YLA hruaitute an tel a ni.