State Level  Children Science Congress vawi 23-na chu October 15-16,2015 chhung khan Chaltlang YMA Hall-ah hman a ni a, Ni 16.10.2016 Zirtawpni chawhnu dar 3 a kharna inkhawm neihah Pu Joseph Lalhimpuia Parliamentary Secretary chuan khuallian niin a hmanpui.

Parliamentary Secretary chuan thusawiin Scientist ni tur chuan huaisen a ngai a, discipline neih that a ngai a, ruihtheih thilin a tihbuai loh nih a ngai a ni a ti a. Inkhel thiam te, zaithiam te hian an professional-ah  theih tawp an chhuah a, an tui a, an thiam bawk a, sum tam tak an hlawhchhuak thin. Chutiang bawk chuan Scientist te hian an bei hah a, an thiam bawk a, chu chu an thawhrimin a rawn phurhchhuah a ni tiin chutianga thawk rim ve tur Zirlai kalkhawmte chu a fuih a, khawvel hmun danga miten an tih ang ni ngawt lovin Mizorama kan tih theih dap chhuak thiam turin a fuih bawk.

Zirna lama Mizoram sorkar hmalakna sawiin Pu Joseph Lalhimpuia chuan Aizawl leh Lunglei-ah Education hmunpui din a ni dawn a ni a ti a. Zirna lamin hma a sawn zel a, zirtirtu hna lakah pawh Science leh Mathematics teacher lak an ni dawn a ni a ti a. RMSA hmalaknain Kala Utsav hnuaiah Cheraw intihsiak buatsaih a ni dawn a, Industry Deptt. a Bamboo Development Agency (BDA) te  nen tangkawpin hnam lam intihsiak hi buatsaih a ni dawn a ni a ti bawk.

Science Teachers Association of Mizoram (STAM)-in a buatsaih Children Science Congress-ah hian District tin atangin zirlaite an tel a. District tinah RMSA ten Science Congress an lo neihpui a, chumi avang chuan kumin Children Science Congress-ah hian zirlaite an tel tha niin STAM hruaitute chuan an sawi. 

He State Level Children Science Congress neih atang hian Mizoram aiawha tirh chhuah turte thlan an ni a. National Children Science Congress 2015 December 27-31, 2015 chhunga Chandigarh a neihah Project 8 present turin zirlai 8 thlan chhuah an ni a. Indian Science Congress January 2016 chawlhkar hmasa bera Mysore-a neih turah zirlai 2 tel turte thlan an ni bawk.