Vawiin hian Lawngtlai DC Conference Hall ah Lai Autonomous District Council Electoral Roll, 2015 Final chu District Election Officer Pu J. Hmingthanmawia’n a tlangzarh.

Kan hma lawka Lai Autonomous District Council inthlanpui lo awm tur inbuatsaihna kal zelah Mizoram State Election Commission chuan vawiin hi LADC Electoral Roll Final Publication neihni atana a ruat angin, District Election Officer chuan Electoral Roll hi a tlangzarh a. Pu J. Hmingthanmawia chuan theih tawp chhuahin thawktuten kan bei a, amaherawh chu tisual palh thei kan nih avangin a dik vek ang, chu kan ti ngam bik lo a ni. Dik tawklo a lo awm palh hlauh a nih chuan rang taka siam that a nih theih nan inhrilh hre thin ila kan lawm hle ang, a ti.

LADC Electoral Roll 2015 ah hian Voters 45757 an awm a, an zinga 23279 te hi hmeichhia niih a bak 22478 te chu mipa an ni. Constituency voter tamna ber chu Sakeilui bial a ni a, voter 3067 an awm a. Voter tlemna ber chu Cheural niin voter 1145 an awm thung. Polling Station voter tamna ber chu Lawngtlai III a ni a, vote thlak thei 1153 an awm. Voter tlemna ber Polling Station erawh chu Hlimzawl niin Voter 73 an awm thung. Hlimzawl khuate hian vote an thlak tha thin hle a, kan hnunga MLA leh MP inthlanahte pawh khan 100% in vote an thlak a ni.

LADC General Election vawi 10 na nei turin tunah hian State Election Commission chu a inbuatsaih mek a, LADC hian Member of District Council, Elect seat 25 leh Nominate seat 3, a vaiin Member 28 a nei mek a ni.