Directorate of Science & Technology hnuaia Mizoram Remote Sensing Application Centre (MIRSAC)-in Remote Sensing leh Geographic Information System (RS&GIS) thiamna hmanga Mizoram luidung zirchianna an buatsaih Watershed Atlas of Mizoram chu vawiin chhun khan Chief Secretary Pu Lalmalsawma, MIRSAC Governing Body Chairman ni bawk chuan C.S.Conference Room ah a tlangzarh.

Thusawiin Pu Lalmalsawma chuan tunlai science thiamna hmanga Mizoram chhunga lui leh tui luan dan kimchang tak, a kawr hawp ramri chin nen fel taka tarlanna Bu buatsaih a ni ta chu lawmawm tiin a buatsaihtu te chungah lawmthu a hrilh a. Mizoram luidung te chu a tangkai dan tur angin kan la hmang tangkai lo tiin Pu Lalmalsawma chuan tunah chuan lui dung pawimawhna leh remchanna te kan hre deuh deuh tawh a, kan la bawh deuh deuh dawn a ni, a ti. Tunlai hmasawnna hrang hrang atana ruahmanna ah hian watershed dungzuia kalpui a ni tlangpui tawh a, hemi atana tul leh pawimawh em em Watershed Atlas MIRSAC-in an buatsaih thei chu lawmawm tiin Chief Secretary chuan Mizoram chhunga hmasawnna hna thawktu Department hrang hrang ten an hman tangkai ngei a beisei thu a tarlang bawk.

Dr R.K.Lallianthanga, Chief Scientific Officer leh Member Secretary, MIRSAC chuan Watershed Atlas an siam dan power point presentation hmangin a sawifiah a. Kum 2014 khan Indian Space Research Organisation (ISRO) leh Central Water Commission (CWC) tangkawp ten India ram pum huapin Watershed Atlas an siam a, mahse hmasawnna atana ruahmanna siam tur chuan thensawm leh a ngai a. Chumi ang chuan Sub-Watershed, Mini-Watershed leh Micro-Watershed ah te then sawm leh vek a ni a. Mizoram ah Watershed 43, Sub-Watershed 472, Mini-Watershed 939 leh Micro Watershed 3,021 a awm a. India ram pum huapa coding an pek dungzuiin Micro-Watershed thlengin a Code hi pek vek an nih dan te a tarlang bawk.

Watershed Atlas tlangzarhna inkhawm hruaitu Dr C.Vanlalramsanga, Planning Department Secretary chuan map bu siam thar chu Mizorama hmasa ber leh awmchhun a nih thu a sawi a. Hmasawnna atana ruahmanna siam dawnin data base mumal tak, dik leh rintlak neih a tul a, chutiang tarlanna bu siam puitlin a ni thei chu a lawmawm hle a ni, a ti. India ram pum huapa coding pek vek a nih avangin Micro-Watershed tin chuan code hran theuh an nei a. Hmasawnna tura ruahmanna siam a nih pawhin a code atang chuan awlsam takin a awmna hmunte a zawn chhuah theih dawn a a ni, a ti. Development Department ten an tangkaipui hle dawn a ni tiin Atlas siamchhuaktu MIRSAC-a thawktute chungah lawmthu a sawi bawk.

Watershed Atlas tlangzarhna inkhawm ah hian Department hrang hrang atanga officer lo kal ten an hnathawhna ah hmanraw tangkai tak a nih tur thu te sawiin Mizoram tana rotling Watershed Atlas buatsaih a ni ta chu lawmthu an sawi a. Department aiawha lo kal zawng zawng te hnenah hian Atlas bu hi hlan nghal an ni.