Vawiin khan Mizoram Governor Lt.Gen(Rtd.) Nirbhay Sharma leh a nupui Pi Jyotsna Sharma te chuan Aizawl khawpui laili a vantlang leh sakhaw hmun pawimawh an tlawh. Baptist Kohhran Executive Secretariat Office-a bul tanin, MHIP General Headquarters Treasury Square; Aizawl Temple leh Territorial Headquarters; Govt. Chaltlang Hr.Sec.School; Mizoram UPC Kohhran, Chaltlang leh Aizawl Mosque, Dawrpuite a tlawh a ni.

Baptist Kohhran Executive Secretariat Office leh Baptist Book Room tlawhin Governor Lt.Gen(Rtd.) Nirbhay Sharma chuan ram chhung hmundangte anglo takin Mizoramah kohhran leh tlawmngai pawlte’n hmun pawimawhtak an luah chu entawntlak a tih thu a sawi a. Mizorama a khawsak chhung hun reiloteah zirtur thil tam tak a hmu tih sawiin ram ralmuang ber nih ringawt duh tawk lova, lehkhathiam tam tak awmna State hian hmasawn tura theihna an neih chu haichhuaka, ram hmasawn nih tum turin a chah a ni. Governor chuan Baptist Kohhran hotulute kaltlang hian Aizawl leh ramchhung hmun danga an kohhran member-te hnenah thu chahin hriselna kawngahte, khawtlang nuna sualna hrang hrang dona kawngahte, HIV/AIDS do kawngahte tang tlang turin a sawm a. Thalaiten State pawnah eizawnna tha an hmuh theih nan skill development lam hawi ngai pawimawh tur leh Hindi leh English nal taka tawng thei tura inzir turin a fuih bawk a ni.

Governor leh a nupui hi Executive Secretary Rev.Dr.V.Laldingliana hova lo dawngsawngin function tawite an buatsaih a. He hunah hian AICS Principal Rev.Dr.Zolawma’n thu sawiin Mizoram Baptist Kohhran kalphung tlangpui leh an rawngbawl dante a hrilhfiah a, an mamawhte Governor hnenah hian a thlen nghal bawk a ni.

MHIP Gen.Hqrs.Office tlawhin an Committee Room-ah MHIP Gen.Hqrs. Office Bearers-te nen inkawmhona hun tawite an hmang a. Hetah hian Mizoram Governor Lt.General (Rtd.) Nirbhay Sharma chuan Mizo hmeichhiate tana MHIP in hna a lo thawh tawh leh an hmalakna a ngaihsan thu a sawi a. MHIP aiawhin an Vice President Dr.Thanpuii chuan an pawl chanchin tlangpui leh hmachhawpte a lo hrilh a ni.

Hemi hnu hian Governor chuan Aizawl Temple Corps tlawhin Commanding Officer Major Lalhuma, Division Commander Maj.S.Biakliana, Local Officer-te leh Corps Council Member-te’n an lo dawngsawng a. Territorial Headquarters tlawh zui nghalin Salvation Army India Eastern Territory hotulu ber Commissioner Lalngaihawmi kaihhruaiin Governor lawmna programme tawi an buatsaih a, hetah hian Governor chuan Salvation Army inkaihhruai dan leh vantlang mipui tana an thawh nasatzia fakawm a tih thu a sawi a ni.

Govt. Chaltlang Hr.Sec.School-ah Principal hovin School naupang leh Staff-te’n Governor hi an lo hmuak a. School kawta function tawi buatsaihah Principal chuan kum 1998-a HSSLC exam buatsaih hmasak ber atang khan a titha zual sawm zinga tel pha naupang 10 chuang an neih tawh thu a sawi a, an school mamawhte a thlen nghal bawk. Hemi zawh hian Governor chuan Mizoram UPC Biak In, Chaltlang a tlawh a. Kohhran Chairman Elder H.Zosangliana hova lo dawnsawngin an kohhran chanchin tlangpui a tarlang nghal a. Hemi zawh hian Aizawl Mosque, Dawrpui tlawhin Aizawl Mosque Committee hruaituten an lo dawngsawng a ni.

Governor hi a Secretary Pu Rodney Ralte leh Aizawl Bawrhsap Dr.Franklin Laltinkhuma leh official ten an tawiawm a ni.