Champhai District-a High School zirtirtute tana RMSA buatsaih, In-Service Teachers' Training 2015-2016 chu vawiin khan I&PR Auditorium, CHANEM building-ah tan a ni.

Training tanna puala inkhawm tawi buatsaih, Pu C.Hualrikhuma, Dy DPC RMSA kaihhruaiah hian Pu RL Thianghlima, Principal DIET chu khuallian a ni a. Thu sawiin DIET Principal chuan school leh zirtirtu ten result tha tak nei tura hna thawhah chauh hmalakna a tawp tur a nilo, a ti a. Zirlai naupangte hmasawnna leh, nakin zela mi puitlinga an chhuah theihna tura chher kawngah pawh hmalak tel a tul a ni, a ti a. Kan hna thawh dan hian midang hmalam hun a hril avangin inthlahdah taka thawh theih a ni lova, ruahmanna pawh fel tak kan neih a tul a ni, tih sawiin, training chu hlawk taka hmang a, naupangte zirtirna tur thil tangkai tak paw chhuak ngei turin kalkhawm zirtirtute chu a chah a ni.

In Service Teachers Training hi language zirtirtute tan tunkar chhung neih a ni dawn a, Govt. Champhai College-a Professor leh DIET lecturer ten zirna lam kaihhnawihah training an pek dawn bakah, Health Department atangin naupangte hrilselna leh HIV/AIDS chungchang te, Social worker atangin Swachh Bharat leh Child Protection chungchang te bakah RMSA atangin school administration leh sum vawn danah te zirtirna an pe dawn bawk a ni.