Vawiin chawhnu dar 2:00 khan DRDA Conference Hall, Lungleiah Saansad Adarsh Gram Yojana (SAGY) hnuaia District Level Committee member-te chuan a vawikhatna atan an thukhawm a. Lok Sabha MP Pu C.L. Ruala’n Model Village atana a thlan, Haulawng khua a SAGY kalpui dan tur an sawiho.

Meeting hi DRDA Project Director leh Charge Officer ni bawk Pu Joseph H. Lalramsanga, MCS chuan a kaihruai a, SAGY-in a tum tlangpui te hrilhfiahna  presentation hmangin Dr. Malsawmtluanga Fanchun, BDO, Lunglei chuan a nei a ni.

Haulawng ah SAGY hawnna inkhawm hi October ni 21, 2016 hian Lok Sabha MP Pu C.L. Ruala’n Khuallian niin a hmanpui anga, hawnna inkhawm neih ni vek hian Lunglei CMO kaihhruaiin Medical Camp buatsaih a ni ang. Lunglei BDO kaihhruai Sub-Committee chuan SAGY hawnna neih hma hian Haulawng mipui tan awareness campaign a nei dawn a ni.

SAGY hawnna atanga thla 3 (thum) chhunga tih tur, First Stage Activities hnuaia Department tin tena an tih tur thlir ho na neih a ni a. Centrally Sponsored Schemes (CSS) leh developmental scheme khawihtu department-ten Haulawng khua a an hmalakna report October ni 12 aia tlai lo ah an thehlut ang. District Level Committee leh Sub-Committee member-te tan SIRD, Kolasib atangin training pe tura beisei a ni bawk.