School Education changtu Parliamentary Secretary Pu Joseph Lalhimpuia chuan Mizoram sawrkar chuan kohhran school te hi el lovin kan thawhpui zel dawn a, education hi India Danpui Directive Principles of State Policy ah chiang taka tarlan a nih angin Kristian State Mizoram angah phei chuan an inrelbawlnaah pawn lam atanga inrawlh tumna a awm lo, a ti. Mizoram, India ram leh khawvel hmun hrang hranga Monfort zirna in dintu St. Louis Marie Grignion de Monfort thih champha leh Society of Monfort Brothers din champhaphak vawi 300-na lawmna hun vawiina St.Pauls Hr.Secondary School-a neihah khuallian niin Parliamentary Secretary chuan he thu hi a sawi a ni.

Monfort Society chuan a hmathlir hlenchhuakin zirna kawngah khawvel hriat hlawh khawpin an hlawhtling a, hei hi thawktute inpekna vang a ni, Pu Joseph Lalhimpuia chuan a ti a. India ramah Catholic kohhran chu zirna kawnga hmahruaitu a ni a, Mizoram pawh Catholic kohhrante rawngbawlna zarzotu niin zirna school tha tak tak kan neih phah a ni, a ti. Monfort Brothers te enkawl St.Pauls Hr.Sec.School chu a din tirh atang rengin Mizorama zirna in tha ber te zinga mi a ni a, Mizoram chhung hmun hrang hrangah Catholic kohhran chu zirna lam hawia a inzarpharh mek chu thil lawmawm tak a ni tiin Parliamentary Secretary chuan Lengpuiah Catholic kohhran hnuaia Jesuit pawlten College din turin hma an la mek tih a sawi bawk. Pu Joseph Lalhimpuia chuan Monfort Institution hrang hranga zirtirtute chu Mizo naupangte nundan tha zirtir ngaih pawimawhsak turin a sawm a. Classroom pawn lamah eng ang naupang nge an nih zel dawn tih ngun taka ngaihtuah chungin Mizorama institution pawimawh ber te hian zirlaite thinlungah zonunmawi, tlawmngaihna te, aia upa zahthiamna te, rinawmna leh taimakna te tuh tlat turin a fuih a ni.

Society of Monfort Brothers hian ram chhung state 19 ah zirna in hrang hrang 195 an nei a. Mizoramah chuan Aizawlah St.Paul’s Hr.Secondary School, Kolasib-ah St John’s Hr. Sec. School, Chhingchhipah St Peter’s Hr.Sec.School, Khumtung leh Melriatah Monfort School an neih bakah Aizawl Tlangnuamah St.Joseph’s Press an nei bawk. Mizoram hi North East Province of the Brothers hnuaiah awmin Provincial Superior hi Brother Devasi a ni a. Mizorama Monfort Institution tin hnuaia thawktute hian vawiin atanga tanin September ni 30 thlengin Seminar an nei dawn a ni.

Monfort Brothers of St Gabriel dintu Louis de Monfort hian kum 1711 khan France hmar thlang lama khaw pakhat La Rochelle-ah school a din a. Amah leh a thawhpui brother-te chuan mi rethei school kalna neilote tan hmun hrang hrangah school an din a, pawl angin an insiam chho va. India ramah hian kum 1903 khan an lo lut a. India hmarchhakah hian kum 1969 khan an lo lut a ni.