Vawiin khan Chief Minister Pu Lal Thanhawla hovin NEDP Core Committee chu Chief Minister's Office ah an thukhawm a. Core Committee Member Minister te - Finance Minister Pu Lalsawta; School Education Minister Pu H. Rohluna; UD&PA Minister Pu Zodintluanga; LAD Minister Pu P.C. Lalthanliana; Health Minister Pu Lal Thanzara; Vice Chairman, State Planning Board Pu H. Liansailova te an tel a. Member Secretary charge la mek School Education Secretary Pu P. Lalchhuanga; Principal Secretary to CM Pu Lalram Thanga; Principal Secretary Home Pi Renu Sharma; Planning Adviser te bakah Planning & Programme Implementation Department hotulu leh officer dangte an tel a ni.

Chief Minister Pu Lal Thanhawla chuan Sawrkar Laipuiin state te hnenah sum a pekchhhuah dan a thlak avangin Five Year Plan te tihtawp a ni dawn a, Fifteen Year Plan duang turin state te beisei an a nih thu a sawi a. Planning Commission thlaktu NITI Ayog chuan National Development Goals leh UN Sustainable Development Goals te chu ngaipawimawhin hengte hi a draft Fifteen Year Plan ah telh turin thurawn an pek thu a sawi a. Thil ngaihpawimawh bik priority kan neih a tul dawn a, sorkar sum hi a tangkai thei ang ber leh a daihzai thei ang bera kan hman thiam hi a pawimawh hle dawn a ni, a ti.

Vawiin meeting ah hian NEDP hnuaia Scheme leh Project 25 ruahmanna duan sa tawh te chu pawm niin  Scheme leh Project dang 10 tlema la chinfel ngai leh ruahmanna duan tawh tlem siamrem ngai te chu zau taka sawiho a nih hnuin pawm vek a ni a. NEDP hnuaia sector hrang hrangte kalpuina  dan tur Implementation Guidelines duan tawh siamrem ngai te chhawpchhuah chu chipchhiar taka sawiho anih hnuin pawm a ni bawk. Kumina NEDP hnuaia Project kalpui turah hian project dangte bakah thingtlanga mi harsa te hnenah inchung tur rangva semna scheme Çhief Minister’s Rural Housing Scheme pawh telin he Scheme hi kumin atan bik chuan District pathum – Saiha, Lawngtlai leh Serchhip ah te tan a ni phawt dawn a, chhungkaw 1200 vel in he hamthathna hi an dawng dawn a ni. NEDP hnuaiah hian Aizawl khawpui hmun 4 ah pengthuam te tihzauh hna Áizawl Mobility Improvement Scheme te pawh a tel a ni.

NEDP Launching Tlangzarhna chu naktip September ni 30 ah Vanapa Hall a neih a ni dawn a, Chief Minister Pu Lal Thanhawla chu khuallian tura beisei a ni a. He programme ah hian Aizawl khawpuia Trafiic Jam tihziahawm nanSawrkarinTraffic-JamAizawlCitytih programme a duan chu hemi programme ah hian tlangzarh a ni nghal dawn a ni.

Tarlan tawh thin angin NEDP hian ram hmasawnna atana hnathawh dan tha zawk kawng kawhhmuhna leh hlawk zawka thawh dan tur ruahmanna te, infrastructure leh assets kan neih mek hlawk zawk a hman leh enkawl dan mumal tak ruahmanna tur te, sawrkar sum dinhmun siam thatna leh dik leh fel zawka hman dan tur ruahmanna te, Mizoram chhunga sumdawnna leh thil tharchhuah hlawk taka kalpui anih theih nana ruahman te, mipui te tana sawrkar rawngbawlna leh hnathawh chak zawk leh daihzai zawka siam tur a ruahmanna te, Mizo mipuiten thiamna tak tak eizawnna tlak an neih theih nan a hmalak te, sik leh sa inthlak danglam nasa lutuk atanga chhiatna thleng thei laka invenna leh Sawrkar hnathawh dan leh hnathawk te hlawk leh inrenchem zawka kalpui anih theih nana ruahmanna siam te hi a huam vek a. Hetiang taka huam zau leh economy a nghawng (impact) nei lian tur a nih avang hian NEDP hi Comprehensive Growth Strategy tih a ni. Kumin atan NEDP tan cheng nuai 25000 ruahman a ni.