“Sansad Aadarsh Gram Yojana” hmalakna kal zelah Serchhip PHE Department, Serchhip WATSAN Division chuan nimin khan Lok Sabha MP Pu CL Ruala’n Model Village a siam tura a thlan Khawlailungah Faina kawnga inzirtirna beihpui an thlak.

Khawlailung Community Hall ah he hun puala inkhawm buatsaih ah hian Er. Lalhruaia, Sr. EE, PHED, Serchhip WATSAN Division chuan Faina beihpui thlak anih chhan leh India Sawrkarin faina kawnga hma a lo lak tawh dan hrang hrang te a tarlang a, Khawlailung chu Lok Sabha MP in model village a siam tura a lo thlan tawh avangin an ngaipawimawh hle a ni a ti a, SAGY hnuaiah pawisa hman tur a hranpa a a awmloh avangin leh Centrally-Sponsored Scheme hrang hrang atang ngaihpawimawh hmasak tura tih anih angin tun tumah pawh Swachh Bharat Mission (Rural) hnuaiah Sanitation Campaign leh Hand Washing Day kaikawpin hun remchang an siam tih a sawi a, Khawlailung khua chu faina kawnga hma an lo lak tawhna ah fakawm a tih thu leh tha thlah miah lova khaw dangte entawn tura tan la sauh sauh turin a kalkhawmte a fuih.

Nimin Sanitation Campaign-cum-Hand Washing Day programme hi hun hnih ah then niin hun hmasa zawkah faina kawnga inzirtirna neih niin hetah hian Pu Andrew H.Lalremruata, DIPRO, Serchhip chuan faina chungchanga inenkawl dan tur leh ei leh in thlenga fimkhur a tul thu a sawi a, ani bakah hian Khawlailung VCP Pu Thangbawia, YMA President Pu RC Rinzuala leh MHIP President Pi Laihmingthangi te pawhin faina kawnga tan lak a tul zia leh hma lak chhoh zel dan tur te an sawi bawk a, Model Village Sanitation Committee Chairman Pu Lalnunzira Sailo hnen atangin faina kawnga Model Village Sanitation Committee hmalakna report ngaihthlak a ni bawk.

Sanitation Campaign zawh hnu hian Sabawn hmanga kut silfai pawimawhna leh kut silfai dan inzirtirna hun hman leh niin Pu Vanlalzawna, CHO, Khawlailung CHC in kut silfai pawimawhna a sawi a, Pu V.Lalvuana, JE, East Lungdar Section, PHED in kut silfai dan tur a takin a entir a, hemi zawh hian Sikul naupang ten Community Hall kawtah hian ziritrna an dawn angin an kut an silfai a ni. Hand Washing Day hi October ni 15 a ni a, remchan zawkna avangin October ni 8 ah Khawlailung bikah hian hman a ni.

PHE Department chhinchhiah danin Khawlailungah hian chhungkaw 516 an cheng a, tunah hian Solid Waste Management atan project siam niin DPR thehluh a ni tawh a, PPP mode in motor hmangin bawlhhlawh paih thin a nih bakah YMA Section tinah Sanitation Committee din a ni bawk a, Model Village Sanitation Committee in bawlhhlawh paih motorin a thlen phak lohna hmun li ah bawlhhlawh paihna khur an siam bawk a ni. Model Village Sanitaion Committee vek hian sarang leh polythene lakkhawm te kg khat Rs 10 zelin an lei thin a, heng te hi an halral thin bawk a, hei bakah hian khawchhung hmun tinah a khat tawkin bawlhhlawh bawm an dah chhuak vek a, khawtlang huap khawlai tihfai hnatlang a khat tawkin an koh reng bakah ui leh ar khuahkhirh kawngah pawh nasa takin tan an la a ni.

Nimin programme hi Pu Samuel LR Ralte, SDO, PHED, East Lungdar WATSAN Division chuan a kaihruai a, Khawlailung khaw mipuite bakah tlawmngai pawl hrang hrangte leh Village Council hruaitute, zirlaite leh zirtirtute an kal tha hle a ni.