Vawiin khan Jawaharlal Nehru Bhawan, New delhi ah External Affairs Minister Pi Sushma Swaraj chuan ‘Act East Policy’ chungchangah hmarchhak state Governor te a kawm a. He hunah hian Tripura Governor tih loh chu an tel vek thei a, Mizoram Governor Lt.Gen(Rtd.) Nirbhay Sharma pawh in he hun hmang tangkai hian Act East Policy a Mizoram pawimawh zual bik na te a tarlang a ni.

He meeting pawimawh tak ah hian external Affairs Minister Pi Sushma Swaraj chuan hmanlai atang tawha India leh South East Asia ram te inlaichinna na sawiin in Act East Policy pawimawhna kawng 3 a sawi a. Pakhatna ah chuan India in ‘Act East Policy’ a kalpui hian Asia-Pacific huam chhunga ram zawng zawng nena inlaichinna tha neih a tum a, ASEAN ram kan tih bik erawh a ngaipawimawh bik a ni ang a ti. Pahnihna ah chuan he policy hian insumdawn tawnna tha zawk neih bakah heng ram te nena ram venhimna kawnga thawh ho leh hnamzia rang hrang hrang te inhriat thiam sakna hmang tangkaia inlaichinna tha zawk neih a ni a.Pathumna ah chuan Act East Policy hian tawngka hmanga inlaichinna siam tum aiin thiltih hmang leh a taka indawrna chi hrang hrang sumdawnna piah lama inlaichinna siam na a tana thawhhona a kawk zawk a. He policy hian Hmarchhak state te hi indawrna hmunpui leh kawngka ah a hman a ngai dawn a, chu chuan hmarchhak state hrang hrang te hi kawng tin rengah nasa takin a ti hmasawn dawn a ni a ti.

Mizoram aiawhtu Governor Lt.Gen(Rtd.) Nirbhay Sharma pawh in thusawina hun a hmang a.Act East Policy tana Mizoram tangkaina te sawiin Mizoram dung leh vang hman tangkai a nih leh zual nan Ministry Of External Affairs(MEA) hian kawngtha pathum siam tura hmalakna awm mek ah tanpuina liantham tak thawh thei se chu chuan inkalpawhna chungchanga harsatna a sukiang thei dawn a ni a ti. MEA in sawrkar hmalak mekna a tha thawhpui ve se a tih te chu- Kaladan Multimodal Transit Project chhunga lei(bridges) 8 siamna atana Mizoram in Ministry of Road Transport and Highways hnena Estimate a thehluh tak te bawhzui pui leh a tul chuan sum thawh sak, Thega luipui dawhkai nana lei dawh rawtna Mizoram in MEA hnena a thehluh tawh te chak taka bawhzui leh Sairang atang Mizoram chhim tawp thlenga rel kawng sial a tul tur thu te a ni.

Governor hian ram venhimna atan Mizoram chhunga digital connectivity tih hmasawn a pawimawh tur thu pawh a tarlang a. Mizoram ramri hrula border Outpost hrang hrang te ep hian ram thenawm te hian border outpost siam ve turin MEA chuan hma la se ramri hrula harsatna hrang hrang te a ti zia awm ngei ang a ti. Act East Policy hmalakna ti chak turin hmarchhak khawpui ah Headquarters neiin Inter-Ministerial Group on Act East Policy din ni se chu chuan hmarchhak chhunga Act East Policy atana hmalakna vil thei se hmasawnna hmuh theih in a awm ang a ti a. A sawi zel na ah ramri hrula insumdawn tawnna hmun din a nih hma in ram hrang pahnih ten joint study neiin bilateral trade a hlawhtling thei dawn em tih zir hmasa rawh se a ti bawk a ni. A thusawi tih tawp nan External Affairs Minister Pi Sushma Swaraj chu a remchang hmasa ber ah Mizoram rawn tlawh tur in a sawm nghal a ni.