Vawiin hian Pu John Rotluangliana, Tourism Minister hovin a Office Chamber-ah ni thum awh Anthurium Festival, 2015 ni 1st - 3rd October, 2015 chhunga Lengpui Mini Sports Complex a neih thlirletna hun hman a ni.
Pu John Rotluangliana, Tourism Minister chuan Anthurium Festival, 2015 hlawhtling taka hman a nih chungchangah organising committee te chungah lawmthu a sawi a. Inlungrual tak leh thahnemngaihna thinlung nena an thawhna azarah Festival hlawhtling tak kan nei thei a ni a ti. Minister chuan mihring kan thuhmun fo thei lovin ngaihdan inang lo neite kan nih avangin sawiselna awm bawk mahse mipui tam zawkin min hlutpuinaah mipuite chungah lawmthu sawiin changtlung zawk leh hnam dangte pawhin an ngaihhlut theih tur khawpa hman anih theih nana rilru hmang leh zual turin organising committee members te a chah bawk.
He Festival thlirletna hunah hian members ten changtlung zawka Festival hman anih theih nana hmalak tul nia an hriatte leh rawtna te zau takin an sawi a. Sponsorship uar zawk a kalpui a tul thu te, inthiarna changtlung zawka buatsaih a tul thu te, zaithiam zai turte pawhin a theih chen chena mipui chawkhlim zawnga hla sak tur thlan thiam a tul thute bakah Lengpui khaw mipuite inpekna ropuizia te thlirletna hunah hian tarlan ani bawk.
Organising Committee chuan nakum 2015-ah pawh Anthurium Festival hi hman leh nise, a hunah October kar hmasa ber tawp lamah hman nise tiin thuthlukna an siam bawk a ni.
He Anthurium Festival, 2015 hman dan thlirletna hunah hian Pu T.T Zothansanga, Parliamentary Secretary, Tourism, etc., Pu V.Lalremthanga, IAS, Secretary, Tourism Department te bakah Organising Committee Members te an tel tha hle a ni.
