Rajya Sabha MP Pu Ronald Sapa Tlau-in Model Village a siam tura a thlan Chhiahtlang khua chuan kawng hrang hrangah tan la in hmasawnna tam tak an nei tawh a, vawiin khan Chhiahtlang MP Model Village viltu tura ruat Charge Officer Pi Rohnuni Colney chuan Chhiahtlang khua in hma an sawn zel dan te a hmunah enfiahin khawtlang hruaitute nen inkawmhona hun tha tak an hmang a hmalak chhunzawm zel dan tur te pawh an sawiho a ni.
Chhiahtlang khawtlang hruaitute chuan Rajya Sabha MP Pu Ronald Sapa’n Model Village a siam tur atana an khua a thlang chu lawmawm an tih thu sawi nawn lehin MP Model Village atan hian a hrana sum dah awm lo mahse Model Village nihna tur atana thil pawimawh dang tam tak he SAGY programme in a ruahman te chu an phak ang tawk tawkin tihhlawhtlin an tum a, a bik takin faina kawngah tan an la nasa hle tih an sawi a ni.
Village Council thar din anih hnu a thutkhawm hmasa berah Animal Control Committee leh Road Protection Committee din nghal niin chak takin hma an la nghal a, ran khuahkhirh tu (Animal Control Committee) hmalakna hian Ui, Ar leh Ran dangte khuahkhirh tur a ni a, tunah hian Ui khuahkhirh tawh niin mipui pawhin an thlawp tha hle a, khawlaia Ui tla hmuh tur leh man tur a awm tawh lova, September ni 15, 2015 atang hian Ar khuahkhirh tan leh tur niin hetiang hian Ran dang te pawh khauh taka khuahkhirh chhunzawm zel tura ruahmannasiama ni.
Kawng humhalh/venghim tu pawl (Road Protection Committee) pawhin hma chak taka la in vantlang kawng dip zualte leh kawngsira bungraw dahte chu an senghawi tir thin a, mipuiten hei hi an thlawp tha em em a, kawng hnaih lutuk a mahni in luhna kailawn/step awm chhu chhia te pawh an awm a, kawngpuia rod chhut leh rawra chawh te pawh an khap a, kawngpui sira tuihawk luankawr te pawh hnawmhnawkin a hnawh phui loh nan uluk takin an tifai thin a ni.
Swachh Bharat Abhiyan/ Swachh Vidhyalaya 2015-2016 hnuai atangin Rs. 2,25,000/- hmuh niin he pawisa hmang hian School pathumah toilet tha tak sak a ni a, Biometric enrolment special drive pawh neih mek niin tun dinhmunah mipui kum nga chin chunglam zinga 84.73% (3478) in enrolment hi an ti tawh a, la ti velo 627 awmin an zinga 187 erawh hi chuan sakhuana thil avangin enrolment an ti duh lova, midang zawng hi chuan biometric enrolment an tih vek beisei a ni.
