India ram mipui, retheihna atanga chawikanna leh hmasawnna huapzo an chan theihna tura ram hruaitu ten hma an lakna tura duan Saansad Adarsh Gram Yojana (SAGY) hnuaiah Mizoram ah pawh M.P. leh M.L.A. ten Model Village an thlan theuh te khuaa hmalak dan te thlirin vawiin chhun dar 11:00 khan Secretariat Conference Hall ah Chief Secretary Pu Lalmalsawma hovin State Level Empowered Committee an thukhawm a, khaw thlan chhuah hrang hranga hmalak tawh dan leh hmalak chhunzawm zel dan tur te an rel ho.

Meeting ah hian Rural Development Department hotu te, a kaihhnawih Department changtu Secretary/Commissioner te, District tina Deputy Commissioner leh DRDA hotu te an tel a, District tin atangin Village Development Plan duan anga hmalak tawh dan te an sawifiah a, department dang ten hmasawnna ruahmanna an kalpui mek te nen a remchan anga hmalak ho zel ni se tiin an rel. MLA SAGY District Nodal Officer atan Deputy Commissioner te chu an hna ah an tul em avangin chak zawka kalpui a nih theih nan District tin ten an remchan angin Nodal Officer tur inruat ni se, an ti bawk. MP Model Village hminga hmalakna te chu sawrkar laipui atanga rawn vil a ni a, hun bituk angin Phase I (Wave 1) chu October 2016 ah zawh hman tura ruahman a ni. MLA SAGY erawh chu bultan tlai deuh a nih avangin March 2017 thleng hun pawh fan ni se tiin an rel bawk. District hrang hranga Model Village siam nana hmalakna te chu a tha thawkhat a, harsatna an tawh te leh a sutkian dan tur te, chak zawka hmalak chhunzawm zel a nih theih nan bawhzui zel dan tur te an ngaihtuah ho bawk a ni.

District hrang hranga MP leh MLA ten Model Village an thlan dan chu hetiang hi a ni :-

Aizawl District-10 nos.

Lunglei District-8 nos.

Saiha District-2 nos.

Champhai District-6 nos.

Kolasib District-3 nos.

Lawngtlai District-3 nos.

Mamit District-3 nos.

Serchhip District-7 nos