Vawiin chhun khan Urban Development & Poverty Alleviation Department (UD&PA) leh Indian Oil Corporation Ltd. (IOCL) chuan UD&PA Minister Pu Zodintluanga Office Chamber-ah thawhhona thuthlung, Memorandum of Agreement (MoA) an ziak a. UD&PA aiawhin Secretary Dr. C Vanlalramsanga leh Director Pu Zorammuana-te’n hming an sign a, IOCL aiawhin Indian Oil AOD, Guwahati-a Chief HR Manager, Pu P.K. Ray-a leh IOCL Corporate Office, New Delhi-a Sr. Corporate Communication Manager Pu L.L. Khongsai-a ten hming an sign bawk. He MoA ang hian IOCL hian Aizawl khawpui chhung hmun hrang hrangah vantlang hman atan bawlhhlawhbawm an dah dawn a ni.
He MoA ziah puala inkhawmah UD&PA Minister Pu Zodintluanga chuan thutawi sawiin Mizoram chu India rama State fai bera siam tum a ni, a ti a. Aizawl mipui zingah khawlaia bawlhhlawh paihdarh mai mai ching an la tam avangin Aizawl khawpui chu zingkarah fai viau mahse, ni a tlangsan meuh chuan a tawp hman viau zel tih sawiin Minister chuan UD&PA hotute leh IOCL hotute hmalakna zarah Aizawl khawlaiah bawlhhlawhbawm engemawzat hun a lo ni dawn ta chu lawmawm a tih thu a sawi a. Mipuite pawhin khawlaia bawlhhlawh paihdarh mai mai chu thil zahthlak a ni tih hria se a duh thu sawiin, bawlhhlawhbawm hmang tangkai deuh deuh turin Minister chuan mipuite a sawm bawk. Minister chuan tuna Aizawl khawpui bawlhlawh sawngbawl dan leh hmalakna kal mekte IOCL hotute sawipuiin tuna thawhhona chu a bultanna chauh ni thei se a duhthu leh Mizoram mamawh dang, damdawiin leh zirnain thuamthat kawngahte pawh hma lakpui zel turin a sawm bawk a ni.
He MoA ziahna inkhawm tawi hi UD&PA Secretary Dr. C Vanlalramsanga chuan a kaihruai a. IOCL hotuten UD&PA hmalaknate leh rawtnate an phurpui leh hmalakpui zel tura an inhuam avangin lawm thu a sawi a. Mizoram mipuite tan IOCL-ten nasa zawka hna an thawh theih nan hmalak zel tum a nih thu a sawi bawk.
Indian Oil AOD, Guwahati-a Chief HR Manager, Pu P.K. Ray-a pawhin an Corporation hnathawh dan leh kalphungte sawifiahin, Companies Act-in a phut angin kum khat chhunga an hlep atanga zaa pahnih chu mipuite hamthat nan an hman thin thu a sawi a. IOCL hian an hmalaknaah hian hriselna leh thianghlimnate, tui in tur thianghlimte, zirna, thalaite hna thawh tur siam sakte leh sik leh sa chhe zel tur ven kawnga sawrkar hmalakna thawhpuite chu an ngaih pawimawh zual thu Pu Ray-a chuan a sawi a. Mizote bula khawsak chu nuam a tih thu leh Mizoram thingtlang khaw hrang hrangte hmasawnna tura thawhhona neih zel a chak thu Pu Ray-a chuan a sawi bawk a ni.
Pu L.L. Khongsai-a pawhin UD&PA nena an indawr dan sawiin Department-a thawktute inpekna chu a fak a. Mizoram sawrkar chu sawrkar felfai leh tha ber ni a a hriatthu sawiin Mizo mipuite rinawmna chu hmun hrang hranga ‘Nghahloh dawrte’ chuan an tarlang chiang hle a ni, a ti bawk.
He hunah hian UD&PA Department Joint Secretary Pu Vanlalmawia leh Joint Director Pu James Lalnunmawia bakah Mualkhang IOCL LPG Bottling Plan a Senior Manager Pu Lalngaisang Khozol-te pawh an tel a ni.
