Vawiin khan Sports Authority of India, STC, Mission Vengthlang, Aizawl hmunah sikul hrang hranga Physical Education Teachers/PTIs te tan ‘One Day National Level Training of Trainer (TOT)’ neih a ni a. He Training hi 'Khelo India' Scheme hnuaia buatsaih niin Physical Education Teachers 50 chuang lai an tel a ni.

National Level Training of Trainer (TOT) hawnna inkhawm Dy. Director, SAI Pu Lianminthang kaihhruaiah training hawngtu Pu James Lalrinchhana, Addl Director, Education chuan nun hlim leh hlawhtlinna hmu tur chuan mihringte hian hriselna tha an mamawh a ni a ti a. Vawiina Training-a tel zawng zawngte chuan Mizorama sikul naupang leh thalaiten hriselna tha an neih theih nan theihtawp chhuah turin a chah. Dy. Director, SAI Pu Lianminthang pawhin Mizoramah ‘Khelo India’ leh ‘Fit India Movement’ te hi a hlawhtling ngei turin mitin ten hrisel ngai pawimawh a, theihtawp chhuah zel turin a fuih bawk.

‘Khelo India Scheme’ hi sorkar laipuia Ministry of Youth Affairs & Sports (MYAS) chuan rampumah sports eco system tha tak din a nih theih nana bultan a ni a. He Scheme hnuaiah hian rampuma sikul zirlai zawng zawngte taksa hrisel dan tehna (physical assessment) rualkhai taka neih a ni dawn a, hei hi category chi hnih - kum 5-8 te tan 3 parameters leh kum 9-18 tan 6 parameters - hmangin an physical fitness teh a ni ang. Vawiina National level Training of Trainers-a tel PTI zawng zawngte chu Resource Person leh Trainer-ah te hman chhunzawmin district zawng zawngah training an pe chhawng ang. Mizoram pumah sikul zirlai naupangte chu ‘Khelo India Mobile App for Physical Fitness’ hmangin an taksa hrisel dan inang vekin teh a ni dawn a ni. He mobile app-ah hian mahnia inzir theihna tur video-te pawh dah vek a ni a, chumi hmangin fitness programme kalpui dan tur an zir thei dawn bawk a ni. He rampum huap fitness programme hian age group hrang hrangah national fitness index siam a tiawlsam dawn bakah zirlai/thalaite zingah sports lama fitness leh talent nei tha zawnchhuah nan hman nghal a ni thei bawk dawn a ni.

Vawiina one day training of trainers-ah hian Master Trainer Pu Alokesh Boro (Assam), Pu Sanatombi (Imphal) leh Pu Raja Mitra, Regional Manager, Kolkata ten an zirtir a. He training tobul leh thiltumte chu Pu Manikant Sharma, AD & Project Head of Fitness Program (SAI HQ, New Delhi), Khelo India-in a sawi thung a ni.